شينجياڭدا «1 - قازان» ۇزاق دەمالىس كەزىندە ساياحات بازارى قىزدى

    قابىلدانعان ساياحاتشى سانى مەن ساياحاتتىق تۇتىنۋ سوماسىندا جاڭا رەكورد جارىققا شىقتى

    اۆتونوميالى رايوندىق ساياحاتتى دامىتۋ كوميتەتىنەن ۇعىسۋعا قاراعاندا، مەملەكەت مەرەكەسى مەن ورتاڭعى كۇز مەرەكەسى كەزىندە، شينجياڭ ەل ىشىنەن 8 ميلليون 477 مىڭ 200 ساياحاتشى (رەت) قابىلداپ، ەل ءىشى ساياحات جالپى تۇتىنۋىنىڭ مولشەرى 11 ميلليارد 262 ميلليون يۋانعا جەتىپ، قابىلداعان ساياحاتشىنىڭ جالپى سانى مەن ساياحاتتىق تۇتىنۋدىڭ جالپى سوماسىندا تاريحتاعى جاڭا رەكورد جارىققا شىقتى.

    قوس مەرەكە كەزىندە، بوعدا كولىنىڭ كۇزگى اسەم كورىنىسى ساياحاتشىلاردى وزىنە تارتتى. ساياحاتشىلار قول تەلەفوندارى مەن فوتو اپپاراتتارىمەن كولدىڭ كوركەم كورىنىسىن سۋرەتكە ءتۇسىرىپ جاتتى. ساندى مالىمەتتەردە كورسەتىلگەنىندەي، 1 - قازاننان 8 - قازانعا دەيىن، بوعدا كولى كورىنىستىك ءوڭىرى 59 مىڭ 599 ساياحاتشى قابىلداپ، بىلتىرعى سايكەس مەزگىلدەگىدەن %28.69 ارتقان؛ ساياحاتتىڭ ەكونوميكالىق كىرىسى 35 ميلليون 759 مىڭ 400 يۋانعا جەتىپ، بىلتىرعى سايكەس مەزگىلدەگىدەن %27.6 ارتقان.

    بوعدا كولى كورىنىستىك ءوڭىرى عانا ەمەس، بيىلعى «1 - قازان» التىن اپتالىعىندا مەملەكەت مەرەكەسى مەن ورتاڭعى كۇز مەرەكەسى قاتار كەلىپ، 8 كۇنگە جالعاسقان ۇزاق دەمالىس ساياحاتشىلاردى ساياحاتتاۋعا قىزىقتىردى، بۇكىل رايونىمىزداعى ءتۇيىندى كورىنىستىك وڭىرلەردە ساياحاتشىلاردىڭ سانى مەن ساياحاتتىق تۇتىنۋ سوماسى ۇزدىكسىز تۇردە تىڭنان ءوستى، ءىشىنارا كورىنىستىك وڭىرلەردە ساياحاتشى سانى مەن ساياحاتتىق تۇتىنۋ سوماسى تاريحتاعى ەڭ جوعارى دەڭگەيگە جەتتى.

    ەكونوميكانىڭ دامۋى مەن كىرىستىڭ ارتۋىنا بايلانىستى، بۇكىل رايونىمىزدىڭ ساياحاتتىق تۇتىنۋىندا دارالىق، وزگەشەلىك، سەيىل - سەرۋەندىك، ساپالىق، ءار الۋاندىلىق ەرەكشەلىكتەر جارىققا شىعىپ، ساياحاتتاۋ، دەمالۋ، كۇتىمدەلۋ سياقتى جاڭا كاسىپتەر ۇزدىكسىز ساپالىلانا ءتۇستى، ۇزاق جول ساياحاتى، قونا - تۇنەپ ساياحاتتاۋ جۇرتتى وزىنە ەرەكشە تارتتى. ءۇي ىشىمەن ساياحاتتاۋ ءار ۇلت بۇقاراسىنىڭ مەرەكەنى تويلاۋىنىڭ جاڭا فورماسىنا اينالدى، ال مادەنيەتتى سەزىنۋ، ساياحاتتىق قىزمەت، سەيىل - سەرۋەن، دەمالىس سياقتى كوپ ساياحاتتىق يقۋاتى بار ساياحات شاعىن قالاشىقتارى جانە شارۋالار شاتتىعى سياقتى جاڭاشا ساياحات دانەكەرلەرى جۇرتتى وزىنە تارتىپ، قالىڭ ساياحاتشىلاردىڭ نەگىزگى نىسانالى جەرىنە اينالدى.

    ساياحات ونىمدەرى مول بولدى. مەرەكەنىڭ الدىندا اۆتونوميالى رايوندىق ساياحاتتى دامىتۋ كوميتەتى ءار ءتۇرلى تۇتىنۋ قاجەتىنە ۇيلەسەتىن تاماشالاۋ ساياحاتى، اۋىل - قىستاق ساياحاتى، ەكولوگيالىق ساياحات، دەربەس نەمەسە جەكە كولىكپەن ساياحاتتاۋ، قالا توڭىرەگىندەگى ساياحات سياقتىلارعا باپ كەلەتىن ساياحات ونىمدەرىن باعىتتامالى تۇردە شىعارىپ، دەمالىس ساياحات بازارى ونىمدەرىن بارىنشا مولىقتىردى. قازان ايىندا وڭتۇستىك شينجياڭنىڭ جەر - جەرىندە جەمىس - جيدەك پىسىپ، شينجياڭنىڭ ءىشى - سىرتىنان كەلگەن قىرۋار ساياحاتشىنى وزىنە تارتتى، قاۋىن - قاربىز، جەمىس - جيدەك ءۇزۋ، كۇزگى كورىنىستى تاماشالاۋ، اۋىل تۇرمىسىن سەزىنۋ، اۋىل - قىستاقتا دەمالىس وتكىزۋ سياقتى ساياحات تۇرلەرى ەرەكشە قىزا ءتۇستى. ساياحاتتىڭ دەم بەرۋىندە كەدەيلىكتەن قۇتىلعان مەكىت اۋدانى «بارلىعىنا ءبىر باعا» ۇلگىسى ارقىلى ءبىر كۇندىك ساياحات، تاماق، جامباس اقىنى تولىق كوتەرۋ، ءبىر كۇندىك ساياحاتتاعى دولان ءبيىن تاماشالاۋ، دولان اس - سۋىن تۇتىنۋ اقىسىن تولىق كوتەرۋ، ءبىر كۇندىك ساياحاتتا ۇلتتىق تاعامدارمەن قامداۋ سياقتى 3 ءتۇرلى ساياحات ءونىمىن شىعارىپ، كوپتەگەن ساياحاتشىلاردىڭ نازارىن اۋداردى.

    جەكە كولىكپەن ساياحاتتاۋ بازارى ۇزدىكسىز قىزدى. سوڭعى جىلدارى جەكە كولىكتەر سانىنىڭ قاۋىرت ارتۋىنا جانە جوعارى جىلدامدىقتى تاس جولدىڭ جەدەل دامۋىنا، وعان قوسا مەرەكە كەزىندە جوعارى جىلدامدىقتى تاس جولداردا جەڭىل كولىكتەردەن اقى الماۋ ساياساتىنىڭ جولعا قويىلۋىنا بايلانىستى، جەكە كولىكپەن ساياحاتتاۋ دەمالىس كەزىندەگى ساياحات بازارىنىڭ دۋمانىن اسىردى. جوعارى دەڭگەيلى كاسىپكەرلەر، فوتوسۋرەت اۋەسكەرلەرى ۇشاقپەن نەمەسە پويەزبەن شينجياڭعا كەلگەن سوڭ اۆتوكولىك جالداپ الىپ، جايشىلىقتاعى گرۋپپا - توپتاردىڭ ساياحات جەلىسىنەن باسقا جەرلەرگە بارىپ ساياحاتتايتىن بولدى. «ساياحات+» دەمالىس كەزىندەگى ساياحاتتىڭ جاڭا اعىمىنا اينالدى. تاراتۋ جىلدامدىعى تەز ميكروبلوگ، ۋيچات سياقتى جاڭا مەديالار شينجياڭنىڭ كۇزگى كورىنىسىن ۇگىتتەيتىن قۇرالعا اينالدى.

جاۋاپتى رەداكتور:سايراش تۇرارجان قىزى