اۋىل - قىستاقتاعى 4387 «قوس ءتىلدى» بالا باقشاسى تامىزدا تۇگەل سالىنىپ بولادى

    مەكتەپكە دەيىنگى «قوس ءتىل» تاربيەسى جارقىن بولاشاققا نەگىز قالايدى

    30 - ماۋسىم لوپ اۋدانى سامپۇل قالاشىعى قاراجانتاق قىستاعىنداعى جاڭادان سالىنىپ جاتقان «قوس ءتىلدى» بالا باقشاسىنىڭ قۇرىلىس ورنىندا جۇمىسشىلار قاۋىرت جۇمىس ىستەۋدە. قىستاق تۇرعىندارى وسى بالا باقشاسىنىڭ ەرتەرەك سالىنىپ بولۋىن ءتورت كوزبەن كۇتىپ وتىر. كەدەي وتباسى اباباكىر ابدىراحىم: بالالارىمىز وسىنداي تاماشا ورتادا «قوس ءتىل» ۇيرەنىپ، تەگىن وقىپ، تەگىن تاماقتاناتىن بولدى، پارتيانىڭ ابزال ساياساتىنا راقىمەت ايتامىز، - دەدى تەبىرەنە.

    بۇكىل شينجياڭ بويىنشا نەگىزگى احۋالدى تەكسەرۋدىڭ ساندى مالىمەتىنە نەگىزدەلگەندە، بيىل بۇكىل شينجياڭ بويىنشا اۋىل - قىستاقتا وقۋ جاسىنداعى ءبىر ميلليون 128 مىڭ 900 بالا بالا باقشاسىنا وقۋعا تۇسەدى، ال مۇنىڭ ىشىندە وڭتۇستىك شينجياڭداعى 3 ايماق، ءبىر وبلىستا 769 مىڭ 400 بالا وقۋعا تۇسەدى ەكەن. بيىل كوكتەم مەرەكەسىنەن كەيىن بۇكىل شينجياڭدا اۋىل - قىستاقتا مەكتەپكە دەيىنگى 3 جىلدىق تەگىن «قوس ءتىل» تاربيەسىن جالپىلاستىرۋ دابىلى قاعىلدى، وقۋ - اعارتۋ ارقىلى حالىققا تيىمدىلىك جاساۋداعى وسى «1 - ءنومىرلى ينجەنەريا» اۆتونوميالى رايوندىق پارتكومنىڭ، ۇكىمەتتىڭ بارىنشا ءمان بەرۋىمەن ءار جەردە بەلسەندى تۇردە ىلگەرىلەتىلدى. اۆتونوميالى رايون جوباعا الىنىپ بولعان اۋىل - قىستاقتاعى «قوس ءتىلدى» بالا باقشالارىنىڭ «سالىنۋعا تيىستىلەرىن مۇمكىندىكتىڭ بارىنشا سالىپ»، بيىل جاڭادان سالىناتىن، كەڭەيتىلىپ سالىناتىن 4387 اۋىل - قىستاق «قوس ءتىلدى» بالا باقشاسىنىڭ تامىز ايىندا تۇگەل سالىنىپ بولۋىن قامتاماسىز ەتىپ، الاڭ - ورنىنىڭ، وقىتۋشىلاردىڭ، وقۋلىق ماتەريالدارىنىڭ بولۋىن شىن مانىندە ورىنداپ، مەكتەپكە دەيىنگى 3 جىلدىق اقىسىز «قوس ءتىلدى» تاربيەنى جاپپاي جۇزەگە اسىرۋدى تالاپ ەتتى.

    «قوس ءتىل» تاربيەسى بۇكىل شينجياڭدا وقۋ - اعارتۋدىڭ دامۋىن ىلگەرىلەتۋدەگى بارىنەن ماڭىزدى ءىس بولىپ كەلەدى.

    ج ك پ اۆتونوميالى رايوندىق 9 - قۇرىلتايىندا «وقۋ - اعارتۋ ارقىلى حالىققا تيىمدىلىك جاساۋدى» قامتىعان حالىققا ءتيىمدى 9 ءىرى ينجەنەريانى ۇزدىكسىز ىلگەرىلەتىپ، «<قوس ءتىل> تاربيەسىن بەلسەنە جەبەپ، 2020 - جىلعا دەيىن از ۇلت وقۋشىلارىنىڭ مەملەكەتتە ءبىر تۇتاس قولدانىلاتىن ءتىل - جازۋدى نەگىزىنەن مەڭگەرۋىن جانە قولدانۋىن قامتاماسىز ەتۋ» كەرەكتىگى العا قويىلدى. وسىعان وراي، اۆتونوميالى رايوندىق پارتكوم «3 جىلدىق سابيلەر تاربيەسىن جالپىلاستىرۋدى الدىمەن ەسكەرۋ، وڭتۇستىك شينجياڭداعى 3 ايماق، ءبىر وبلىستى الدىمەن ەسكەرۋ، <قوس ءتىل> تاربيەسىن الدىمەن ەسكەرۋ، كەدەيلەر قاۋىمىن الدىمەن ەسكەرۋ» شەشىمىن جاساپ، اۋىل - قىستاقتا مەكتەپكە دەيىنگى 3 جىلدىق تەگىن «قوس ءتىلدى» جالپىلاستىرۋدى وقۋ - اعارتۋ ارقىلى حالىققا تيىمدىلىك جاساۋداعى «1 - ءنومىرلى ينجەنەريا» ەتىپ بەلگىلەدى. اۆتونوميالى رايون اۋىل - قىستاقتاعى مەكتەپكە دەيىنگى 3 جىلدىق تەگىن «قوس ءتىل» تاربيە قىزمەتىن جاپپاي اتقاردى، اۋىل - قىستاقتاعى «قوس ءتىلدى» بالا باقشاسى قۇرىلىسىن كۇشەيتتى ءارى وڭتۇستىك شينجياڭنىڭ مەكتەپكە دەيىنگى 3 جىلدىق «قوس ءتىل» تاربيەسىنىڭ وقىتۋشىلار قوسىنىنا 3000 كادردى كومەككە جىبەرىپ، رايونىمىزدىڭ «قوس ءتىل» تاربيەسى ءىسىنىڭ دامۋىن ەرەكشە تاسىلدەرمەن تەزدەتتى.

    بۇدان سىرت، بيىل اۆتونوميالى رايون وقىتۋشىلار قاتارىن تولىقتاۋ جانە وقۋ - اعارتۋعا كومەك بەرۋ سەرپىنىن اناعۇرلىم ارتتىرىپ، اۆتونوميالى رايوننىڭ جەرگىلىكتى ەرەكشە قىزمەت ورىندارىنا 12 مىڭ ادام قابىلداۋ جوسپارىن اتقارىپ، جاڭادان جۇمىسقا قابىلدانعان 3000 قىزمەتكەردى، سولتۇستىك شينجياڭدا جاڭادان ۇسىنىس ەتىلگەن 2000 وقىتۋشىنى، بيڭتۋاننان 2000 كادردى وڭتۇستىك شينجياڭنىڭ اۋىل - قىستاقتارىنداعى بالا باقشاسىنا كومەككە جىبەردى. اۆتونوميالى رايوندىق وقۋ - اعارتۋ مەڭگەرمەسىنىڭ ورىنباسار باستىعى حۋ جۇنحاي بىلاي دەدى: الداعى ۋاقىتتا اۆتونوميالى رايون وقىتۋشى سانىن تولىقتاۋ، بار وقىتۋشىلاردى تاربيەلەۋ، شينجياڭعا كومەكتەسەتىن ولكە، قالالاردىڭ كومەگىنە قول جەتكىزۋ، كادرلاردىڭ وقۋ - اعارتۋعا كومەكتەسۋىن ۇزدىكسىز قولداۋ، ستۋدەنتتەردىڭ پراكتيكا ىستەۋى ارقىلى وقۋ - اعارتۋعا كومەكتەسۋ كولەمىن كەڭەيتۋ سياقتى 4 ءتۇرلى تاسىلمەن «قوس ءتىل» تاربيەسىنىڭ دامۋىنداعى «ولقىلىقتاردى» تولىقتايدى.

جاۋاپتى رەداكتور:سايراش تۇرارجان قىزى