سايىن ساحاراداعى سالتاناتتى مەرەكە

ءتىلشىمىز جاۋھار بولاتبەك قىزى حابارلايدى:

 

    2017 - جىلعى جۇڭگو شينجياڭ ىلە تۇلپارى حالىقارالىق ساياحات مەرەكەسى 16 – شىلدە كۇنى قويناۋى قۇتقا، دالاسى دانگە، ءورىسى مالعا تولعان تۇلپار مەكەنى — موڭعۇلكۇرە اۋدانىندا شىمىلدىعىن اشتى. بۇل رەتكى قيمىلعا مەملەكەتتىك حالىق قۇرىلتايى تۇراقتى كوميتەتىنىڭ مۇشەسى، مەملەكەتتىك حالىق قۇرىلتايى ۇلتتار قىزمەتى كوميتەتىنىڭ ورىنباسار مەڭگەرۋشىسى اسحات كەرىمباي ۇلى، اۆتونوميالى رايوندىق حالىق قۇرىلتايى تۇراقتى كوميتەتىنىڭ بۇرىنعى ورىنباسار مەڭگەرۋشىسى تىلەبالدى ابدىرەشيت ۇلى، اۆتونوميالى رايوندىق ساياسي كەڭەستىڭ بۇرىنعى ورىنباسار ءتوراعاسى قىزايجان سەيىلقوجا ۇلى، ىلە قازاق اۆتونوميالى وبلىستىق پارتكومنىڭ شۋجيى زىڭ سۇن، ىلە قازاق اۆتونوميالى وبلىستىق حالىق قۇرىلتايى تۇراقتى كوميتەتىنىڭ مەڭگەرۋشى ابدىسالام سادىق قاتارلى سيلى قوناقتار قاتىناستى. ەلىمىزدىڭ ءار جەرىنەن كەلگەن ساياحاتشىلار، اقپارات ورىندارىنىڭ تىلشىلەرى جانە جەرگىلىكتى تۇرعىندار وسى اراعا جينالىپ، مەرەكەنى دابىرالى تۇردە سالتاناتپەن وتكىزدى.

    اشىلۋ سالتى «تۇلپار مەن الەم»، «جۇيتكۋ»، «تۇلپار جىرى» قاتارلى ءۇش بولەك مازمۇن مەن مۇراسىم اياقتالۋ الدىنداعى «ون مىڭ تۇلپاردىڭ جۇيتكۋى» ءنومىرىن ءوز ىشىنە الادى. ال بۇل كەزەكتەگى ويىن كورسەتۋ ساحناسى — قولمەن سىزىلعان 3 D ساحناسى شاڭحاي گەننيس الەمدىك رەكوردىنىڭ تىزىمدىگىنە ەنگىزىلىپ، الەمدەگى ەڭ ۇلكەن جايلىمداعى سۋرەت دەگەن باعاعا يە بولىپ، ۋيۆەسكا تاراتۋ سالتى وتكىزىلدى. ساحنانىڭ جالپى كولەمى 2000 شارشى مەتر بولىپ، بەتىنە تۇلپاردىڭ بەينەسى قولمەن سىزىلعان. كوز جاۋىن العان بۇل كورىنىس مايدانداعى كورەرمەندەردى وزىنە ءتانتى ەتتى. ىلە - شالا، ات ونەرىن كورسەتۋ مايدانىندا احالتەكە، ۇلى بريتانيا جىلقىسى، ورىس جىلقىسى قاتارلى الەمگە تانىمالى جىلقى تۇقىمىنىڭ 20 ءتۇرى كورسەتىلدى. ونان سوڭ، كوكپار، قىزقۋار، تەڭگە ءىلۋ، ات ءۇستى ونەرى، كەرۋەن كوش قاتارلى ويىن نومىرلەرى كورسەتىلۋمەن بىرگە، شي جۇن حانىشانىڭ ۇيسىنگە ۇزاتىلۋى حيكايا فورماسىندا سۋرەتتەلدى. مايداندا، ءبىر جۇپ عاشىقتىڭ اۋەدەگى رومانتيكالى ءبيى كورەرمەندەردىڭ قىزۋ قارسى الۋىنا يە بولىپ، مايداندى شاتىرلاعان شاپالاق ءۇنى كەرنەدى. سوڭىندا كەڭ كوسىلگەن ساحارادا 10 مىڭ تۇلپار دۇبىرلەتە جۇيتكي شاۋىپ، اشىلۋ سالتىنىڭ دارەجەسىن تىڭ دەڭگەيگە كوتەرىپ، تۇلپار ساياحات مەرەكەسىنىڭ سالتاناتىن اسىردى.

    ىلە تۇلپارلار مەكەنى، ال تۇلپاردىڭ ناعىز مەكەنى موڭعۇلكۇرە. موڭعۇلكۇرە اۋدانى — ىلە قازاق اۆتونوميالى وبلىسىنىڭ باتىس تۇستىگىنە ورنالاسقان، شينجياڭداعى بىردەن - ءبىر قۋاڭ دالا جوق اۋدان. وسىنداي تاماشا ەكولوگيالىق ورتاسى بولعاندىقتان، موڭعۇلكۇرە بىرتىندەپ تۇلپار باپتاۋ بازاسىنا اينالعان، سونداي - اق «تۇلپار مەكەنى» اتاعىنا يە بولعان. شينجياڭ ىلە تۇلپارى ساياحات مەرەكەسى 1993 - جىلدان باستاۋ العان، قازىرگە دەيىن 24 كەزەك وتكىزىلگەن. باستابىندا كىشى-گىرىم عانا كولەمدەگى حالىق اراسىنداعى مەرەكە بولاتىن، 2009 - جىلى وبلىس كولەمىندەگى مەرەكەگە، 2013 - جىلعا بارعاندا، اۆتونوميالى رايون كولەمىندەگى ساياحات - مادەنيەت مەرەكەسىنە اينالدى. ال، قازىر اۆتونوميالى رايوندىق ساياحات مەكەمەسى جاعىنان شينجياڭداعى 10 ءىرى ساياحات مەرەكەسى قيمىلىنىڭ ءبىرى دەپ باعالاندى.

    بۇل كەزەكتەگى ىلە تۇلپارى ساياحات مەرەكەسى 16- شىلدەدەن 25 - شىلدەگە دەيىن جالعاسادى. بۇرىنعى جىلداعىمەن سالىستىرعاندا كوپتەگەن جاڭادان قوسىلعان تىڭ مازمۇندار بار. مىسالى، اشىلۋ سالتىنداعى ساحنا، جايلىمداعى ەڭ ۇلكەن بەلگى، ەرىكتى تۇردە جەڭىل اتلەتيكا جارىسىنا قاتىناسۋ، ۆەلوسيپەد ءمىنۋ، قازاقى توي ءداستۇرى، سونداي-اق بيىل تۇڭعىش رەت تومەن كەڭىستىكتە ساياحاتتاۋ العا قويىلدى، ساياحاتشىلار تىك ۇشارعا وتىرىپ، موڭعۇلكۇرەنىڭ كوركەم تابيعاتىنان ءلاززات الادى.

جاۋاپتى رەداكتور:سايراش تۇرارجان قىزى