شي جينپيڭ پۋتينمەن بىرگە شىنجىن بەيجيڭ جاراتىلىستىق عىلىمدارى - ماسكەۋ ۋنيۆەرسيتەتىنىڭ وقۋ باستاۋ راسىمىنە ارناپ جەكە - جەكە قۇتتىقتاۋ ءسوزىن جولدادى

    شينحۋا اگەنتتىگىنىڭ 13 - قىركۇيەكتە شىنجىننان بەرگەن حابارى. مەملەكەت ءتوراعاسى شي جينپيڭ 13 - قىركۇيەكتە رەسەيدىڭ زۇڭتۇڭى پۋتينمەن بىرگە شىنجىن بەيجيڭ جاراتىلىستىق عىلىمدارى - ماسكەۋ ۋنيۆەرسيتەتىنىڭ وقۋ باستاۋ راسىمىنە ارناپ جەكە - جەكە قۇتتىقتاۋ ءسوزىن جولدادى.

    شي جينپيڭ قۇتتىقتاۋ سوزىندە مىنالاردى اتاپ كورسەتتى: وقۋ - اعارتۋ − مەملەكەتتىڭ دامۋى مەن العا باسۋىنداعى ماڭىزدى قورعاۋشى كۇش، سونداي - اق ءار ەل حالقىنىڭ قارىم - قاتىناسى مەن سەلبەستىگىن جەبەيتىن ماڭىزدى دانەكەر. تاياۋ جىلداردان بەرى، جۇڭگو مەن رەسەيدىڭ وقۋ - اعارتۋ جاعىنداعى سەلبەستىگى ىشكەرىلەي دامىپ، ەكى ەلدەگى جوعارى وقۋ ورىندارىنىڭ اۋىس - كۇيىسى ونان ارى نىعايدى، بۇل ەكى ەلدىڭ جانە ەكى ەل حالقىنىڭ ءوزارا ءتۇسىنىسۋىن، دوستىعىن تەرەڭدەتىپ، جۇڭگو - رەسەي جان - جاقتى ستراتەگيالىق سەرىكتەستىك قاتىناسىنىڭ جوعارى دەڭگەيدە دامۋىن ىلگەرىلەتۋدە بەلسەندى رول اتقاردى. جۇڭگو مەن رەسەي بىرلەسىپ شىنجىن بەيجيڭ جاراتىلىستىق عىلىمدارى - ماسكەۋ ۋنيۆەرسيتەتىن قۇرۋ − پۋتين زۇڭتۇڭ ەكەۋىمىزدىڭ قول جەتكىزگەن ماڭىزدى ورتاق تانىمىمىز، سونداي - اق ەكى ەلدىڭ گۋمانيتارلىق سەلبەستىگىنىڭ ىشكەرىلەي دامۋىنىڭ قول جەتكىزگەن كەسەك تابىسى، بۇل ماڭىزدى ۇلگى كورسەتۋ سيپاتىندىق مانگە يە.

    شي جينپيڭ بىلاي دەپ باسا دارىپتەدى: مەن ەكى ەلدىڭ وقۋ - اعارتۋعا جاۋاپتى تاراۋى مەن وقۋ - اعارتۋ قىزمەتكەرلەرىنىڭ ءوز باسىمدىقتارىن ساۋلەلەندىرىپ، سەلبەستىك ورناتۋدىڭ كومەسكى كۇشىن اشىپ، شىنجىن بەيجيڭ جاراتىلىستىق عىلىمدارى - ماسكەۋ ۋنيۆەرسيتەتىنىڭ ءتۇرلى قۇرىلىستارىن كەمەلدەندىرۋدى جەدەلدەتىپ، جوعارى دەڭگەيدەگى ۋنيۆەرسيتەت قۇرىپ، ساپالى دارىندى تاربيەلەۋىن، جۇڭگو مەن رەسەيدىڭ وقۋ - اعارتۋ جاعىنداعى سەلبەستىگىن تەرەڭدەتۋ، ەكى ەل حالقىنىڭ دوستىعىن كۇشەيتۋ جولىندا ۇلەس قوسۋىن ءۇمىت ەتەمىن.

    پۋتين قۇتتىقتاۋ سوزىندە بىلاي دەدى: وقۋ - اعارتۋ سەلبەستىگى ەجەلدەن رەسەي مەن جۇڭگونىڭ ستراتەگيالىق سەرىكتەستىك قاتىناسىنىڭ ماڭىزدى قۇرامداس بولەگى. ەكى ەلدەگى جوعارى مەكتەپتەردىڭ تىكەلەي بارىس - كەلىسى جىل سايىن كوبەيىپ، ءوزارا وقۋشى جىبەرىپ اۋىس - كۇيىس جاساۋ ىستەرى بارعان سايىن كەمەلدەنە ءتۇستى، ەكى ەلدەگى ورتا مەكتەپ وقۋشىلارىنىڭ ءبىر - ءبىرىنىڭ تىنىعۋ ورىندارىنا بارىپ دەمالىس وتكىزۋى ۇنەمىلىك جاعدايعا اينالدى. مەن ەكى ايگىلى ۋنيۆەرسيتەت نەگىزىندە قۇرىلعان رەسەي - جۇڭگو ۋنيۆەرسيتەتى ەكى ەل حالقىنىڭ دوستىعى مەن ءوزارا ءتۇسىنىسۋىن ونان ارى تەرەڭدەتەتىندىگىنە؛ وسى مەكتەپتەن وقۋ تاۋىسقان ستۋدەنتتەردىڭ رەسەي مەن جۇڭگودا عانا ەمەس، دۇنيە ءجۇزىنىڭ قاي جەرىنە بارسا دا قىزۋ قارسى الۋعا يە بولاتىندىعىنا كامىل سەنەمىن.

جاۋاپتى رەداكتور:سايراش تۇرارجان قىزى