جۇڭگو مەن قىرعىزستاننىڭ ەڭ ۇلكەن ەنەرگيا سەلبەستىك نىسانى − بىشكەك جىلۋ ەلەكتر ستانسياسى وندىرىسكە قوسىلدى

     30 - تامىزدا جۇڭگو كاسىپورنى − ەرەكشە ترانسفورماتور شەكتى جارنا سەرىكتەستىگى ۇستىنە الىپ قۇرىلىس جۇرگىزگەن قىرعىزستان بىشكەك جىلۋ ەلەكتر ستانسياسى نىسانى قۇرىلىسى اياقتاپ، وندىرىسكە قوسىلدى. جاڭادان سالىنعان جىلۋ ەلەكتر ستانسياسىنىڭ ەلەكتر مولشەرى بۇرىنعى جىلىنا 262 ميلليون كيلوۆات - ساعاتتان جىلىنا ءبىر ميلليارد 740 ميلليون كيلوۆات - ساعاتقا، جىلۋمەن قامداۋ مولشەرى ءبىر ەسەگە جۋىق ارتادى. ول قازىر بىشكەكتەگى وسىزاماندانعان تۇڭعىش جىلۋ ەلەكتر ستانسياسى.

    ۇعىسۋعا قاراعاندا، 2013 - جىلعى شاڭحاي ىنتىماقتاستىق ۇيىمىنا مۇشە ەلدەر باسشىلارىنىڭ كەڭەسى كەزىندە ەرەكشە ترانسفورماتور شەكتى جارنا سەرىكتەستىگى مەن قىرعىزستان جاعى وسى ەلدەگى ەڭ ۇلكەن جىلۋ ەلەكتر ستانسياسىن جاڭالاۋ نىسانى قۇرىلىسى − بىشكەك 150MW×2 جىلۋ ەلەكتر ستانسياسىن جاڭالاۋ نىسانى توقتامىن جاساسقان.

    قىرعىزستاننىڭ زۇڭتۇڭى الماز اتامبايەۆ قۇرىلىستىڭ اياقتاۋ راسىمىنە قاتىناستى. ول: اتالعان نىساننىڭ سالىنۋى جۇڭگو مەن قىرعىزستاننىڭ سەلبەستىك سەرىكتەستىك قاتىناسىنىڭ ەنەرگيا سالاسىندا جاڭا دەڭگەيگە كوتەرىلگەنىن كورسەتەدى. جىلۋ ەلەكتر ستانسياسىنىڭ سالىنىپ وندىرىسكە قوسىلۋى جۇڭگو مەن قىرعىزستاننىڭ ناقتى سەلبەستىگىنىڭ تيپتىك ۇلگىسى بولۋمەن بىرگە، ونان دا ماڭىزدىسى، جۇڭگو - قىرعىزستان دوستىعىنىڭ سيمۆولى، - دەدى.

    جۇڭگونىڭ قىرعىزستان رەسپۋبليكاسىنداعى ەرەكشە جانە تولىق وكىلەتتى باس ەلشىسى شياۋ چيڭحۋا جۇڭگو ۇكىمەتى اتىنان استانا بىشكەك جىلۋ ەلەكتر ستانسياسى قۇرىلىسىنىڭ اياقتاپ وندىرىسكە قوسىلعانىن قىزۋ قۇتتىقتاي كەلىپ بىلاي دەدى: بىشكەك وت ەلەكتر ستانسياسى نىسانى جۇڭگو مەن قىرعىزستاننىڭ ستراتەگيالىق سەلبەستىك سەرىكتەستىك قاتىناسىنىڭ جەدەل دامۋىنىڭ تاعى ءبىر كۇشتى دالەلى. اتالعان قۇرىلىس جۇڭگو مەن قىرعىزستاننىڭ ەڭ ۇلكەن ەنەرگيا سەلبەستىك نىسانى. بۇل جۇڭگو - قىرعىزستان ەكى ەل حالىقتارى دوستىعىنىڭ سيمۆولى ءارى ەكى ەلدىڭ جىبەك جولى ەكونوميكالىق بەلدەۋىن بىرگە قۇرۋىنىڭ ماڭىزدى شاراسى.

    ۇعىسۋعا قاراعاندا، ەرەكشە ترانسفورماتور شەكتى جارنا سەرىكتەستىگى وزىق جوبا ۇستانىمىمەن جوبانى ساپالىلاندىرىپ، كەمەلدى، وزىق، سەنىمدى جۇيەلى جابدىقتارمەن قامداپ، ماڭداي الدى قۇرىلىس جۇرگىزۋ، ورناتۋ ساپاسىمەن جوعارى ءونىمدى، حاۋىپسىز، ورنىقتى تاراتاتىن، ەنەرگيا ۇنەمدەپ، جاراقسىز زاتتاردى شىعارۋدى ازايتاتىن، جاسىل، قورشاعان ورتانى قورعايتىن وسىزاماندانعان جىلۋ ەلەكتر ستانسياسىن سالىپ، قىرعىزستان حالقىن يگىلىككە كەنەلتەدى ەكەن. 3 جىلدان بەرى نىسان جۇرگىزۋشى ورىن جابدىقتاردى سايكەستىرۋ، قىستىڭ سۋىق، جازدىڭ ىستىق بولۋ جانە تەحنيكالىق جابدىقتاردى توعىستىرۋ جاقتارىنداعى قيىنشىلىقتاردى جەڭىپ، قىرعىزستاننىڭ ەلەكتر ماماندارىمەن تىعىز سەلبەسىپ، قىرۋار تەحنيكالىق قيىن تۇيىندەردى باعىندىرىپ، بۇرىنعى گەنەراتور اگراگاتتارىنىڭ قالىپتى ەلەكتر تاراتۋىن جانە جىلۋمەن قامداۋىن پارمەندى قامتاماسىز ەتكەن.

    قۇرىلىستىڭ اياقتاۋ راسىمىنە قاتىناسقان، استانا بىشكەكتىڭ باتىسىندا تۇراتىن بەك ەسىمدى 58 جاستاعى تۇرعىندار ۋاكىلى: جۇڭگو كاسىپورنى بىزگە سالىپ بەرگەن جىلۋ ەلەكتر ستانسياسى وندىرىسكە قوسىلدى. ۇيگە الدىن الا جىلۋ قوراپشا دا ورناتىلدى. بۇدان بىلاي ءبىر ءۇيلى جان قىستا جىلى ۇيدە وتىراتىن بولدىق. جۇڭگو، جارايدى، ەرەكشە ترانسفورماتور شەكتى جارنا سەرىكتەستىگى جارايدى! - دەدى.

جاۋاپتى رەداكتور:سايراش تۇرارجان قىزى