شي جينپيڭ شىعىس وڭتۇستىك ازيا ەلدەرى وداعى قۇرىلعاندىعىنىڭ 50 جىلدىعى بايلانىسىمەن قۇتتىقتاۋ تەلەگرامماسىن جولدادى

    شينحۋا اگەنتتىگىنىڭ 8 - تامىزدا بەيجيڭنەن بەرگەن حابارى. 8 - تامىزدا مەملەكەت ءتوراعاسى شي جينپيڭ شىعىس وڭتۇستىك ازيا ەلدەرى وداعىنا كەزەكتى ءتوراعا ەل فيليپپيننىڭ زۇڭتۇڭى دۋتەرتكە قۇتتىقتاۋ تەلەگرامماسىن جولداپ، شىعىس وڭتۇستىك ازيا ەلدەرى وداعى قۇرىلعاندىعىنىڭ 50 جىلدىعىن قۇتتىقتادى. تەلەگراممانىڭ تولىعى تومەندەگىدەي:

    شىعىس وڭتۇستىك ازيا ەلدەرى وداعى قۇرىلعاندىعىنىڭ 50 جىلدىعىنا وراي، مەن جۇڭگو ۇكىمەتى مەن جۇڭگو حالقى اتىنان، سونداي - اق ءوز اتىمنان سىزگە جانە ءسىز ارقىلى شىعىس وڭتۇستىك ازيا ەلدەرى وداعىنا مۇشە ەلدەردىڭ ۇكىمەتى مەن حالقىنا ىستىق ىقىلاستى قۇتتىقتاۋ سالەمىن جولدايمىن.

    شىعىس وڭتۇستىك ازيا ەلدەرى وداعى قۇرىلعان جارتى عاسىردان بەرى ۇزدىكسىز دامىپ، كەمەلدەنىپ، ورتاق تۇلعا بولىپ قالىپتاسىپ، ءوڭىردىڭ بەيبىتشىلىگى مەن ورنىقتىلىعىن قورعاۋدا ماڭىزدى رول اتقارىپ، دۇنيە ءجۇزىنىڭ كوپ ۇيەكتەنۋگە قاراي دامۋىنداعى ۋاكىلدىك سيپاتتى كۇشكە اينالدى. جۇڭگو جاق شىعىس وڭتۇستىك ازيا ەلدەرى وداعى ورتاق تۇلعاسى قۇرىلىسىنىڭ تىڭ دا اناعۇرلىم زور دامۋشىلىققا قول جەتكىزىپ، ءوڭىردىڭ بەيبىتشىلىگىن، ورنىقتىلىعىن، گۇلدەنىپ - كوركەيۋىن جەبەۋ جولىندا اناعۇرلىم زور ۇلەس قوسۋىنا، شىعىس وڭتۇستىك ازيا ەلدەرى وداعىنا مۇشە ەلدەر حالقىنا ءتىپتى دە كوپ باقىت جاراتۋىنا تىلەكتەستىك بىلدىرەدى.

    جۇڭگو شىعىس وڭتۇستىك ازيا ەلدەرى وداعىمەن 1991 - جىلى تىلدەسۋ قاتىناسىن ورناتقاننان بەرى، سەلبەستىك پەن دامۋ نەگىزگى تاقىرىبىنان جازبادى، تاراپتاردىڭ ساياسي جاقتاعى ءوزارا سەنىمى ۇزدىكسىز كۇشەيدى، ناقتى ىستەردەگى سەلبەستىكتەرى ناتيجەلى بولدى. جۇڭگو - شىعىس وڭتۇستىك ازيا ەلدەرى وداعى قاتىناسى شىعىس وڭتۇستىك ازيا ەلدەرى وداعىنىڭ تىلدەسۋ سەرىكتەستەرىمەن بولعان قاتىناسىنداعى ەڭ ومىرشەڭدىك كۇشكە يە، ەڭ باي مازمۇندى قاتىناس بولدى.

    جۇڭگو دوس بولۋ، ادال بولۋ، تيىمدىلىك جاساۋ، كەشىرىمشىل بولۋ ۇستانىمىنان جازباي، 2018 - جىلى جۇڭگو مەن شىعىس وڭتۇستىك ازيا ەلدەرى وداعىنىڭ ستراتەگيالىق سەرىكتەستىك قاتىناس ورناتقاندىعىنىڭ 15 جىلدىعى ورايىندا، قازىرگى جاعدايدى تياناق ەتىپ، ۇزاق بولاشاقتى كوزدە ۇستاپ، جۇڭگو مەن شىعىس وڭتۇستىك ازيا ەلدەرى وداعىنىڭ اناعۇرلىم تىعىز تاعدىرلاس ورتاق تۇلعاسىن قۇرىپ، ونى ازيا تاعدىرلاس ورتاق تۇلعاسىنىڭ ۇلگىسىنە اينالدىرادى.

جاۋاپتى رەداكتور:سايراش تۇرارجان قىزى