ۇزدىك بالا باپكەر ءالىمجان

باقىتبەك ءجۇمادىل ۇلى، مۇقامەتقالي سولتاش ۇلى

    تىلىمىزگە تيەك بولىپ وتىرعان بالا باپكەر ءالىمجان مەدەكە ۇلى قازىر حۋبەي ولكەسى ۋحان قالاسىنداعى مەملەكەتتىك 1- دارەجەلى بايگە ات باپتاۋ كلوبىنىڭ مۇشەسى. ول بايگە ات باپتاۋداي اتالى ونەرىمىزدى جەتتىك يگەرىپ، وسى سپورت تۇرىمەن اينالىسقان 9 جىلدان بەرى مەملەكەتتىك جانە حالىقارالىق بايگە ات جارىسىندا 26 التىن مەدال، 18 كۇمىس مەدال، 14 مىس مەدال جانە كوپتەگەن داڭق گراموتاسىن الىپ، بۇگىنگى كۇنى ەلىمىز ەمەس حالىقارالىق بايگە ات باپتاۋ كلوپتارىنىڭ نازارىن اۋدارعان تانىمال شاباندوز بولىپ جەتىلىپ، اتى الىس جۋىققا جايلىپ وتىر.

    شۇرايلى ىلەنىڭ ورتەكەس وڭىرىندەگى ەرمەنتى دەگەن جەرگە ىرگە تەپكەن بيڭتۋان 4- ديۆيزيا 76- تۋان الاڭىندا 1990- جىلى قازان ايىندا تۋىلعان ءالىمجان مەدەكە ۇلى اكەسىنەن جاستاي ايىرىلىپ، اياۋلى اناسى اسەمحاننىڭ ماپەلەۋىندە، جۇمىسقا شوگەل، ونەر- بىلىمگە قۇشتار بولىپ ەرجەتەدى.

    ول 2008- جىلى ورتالاۋ مەكتەپتى بىتىرگەن سوڭ ەڭ العاش بايگە اتقا ءمىنىپ شاباندوز بولعان كۇننەن باستاپ، ماڭىنداعى كوزقاراقتى جانداردان بايگە اتتىڭ سىنى، جۇيرىك ات تاڭداۋ، شابىسقا جاتتىقتىرۋ سياقتى ات باپتاۋ ونەرىنىڭ قىرى مەن سىرىنا بار ىجداعاتىمەن ءۇڭىلىپ، ەستىگەنىن ويىنا توقي كەلە، بايگە ات باپتاپ، ات ونەرى سپورتىمەن شۇعىلدانۋعا بەكيدى. اۋىل اراسىندا كوزى كورگەندى كوكەيىنە توقىپ، ەستىگەنىن وي ەلەگىنەن وتكىزىپ، ءومىر امالياتىنان تالاي ناقتىلى تاجىريبە جيناپ ۇلگىرگەن ءالىمجان 2009- جىلى اقپان ايىندا وسى كاسىپ سالاسىنداعىلاردىڭ ءجون سىلتەۋىمەن شانشي ولكەسىنىڭ شي- ءان قالاسىنداعى شەتەل تازا قاندى سايگۇلىكتەرى ات كلوبىنا بارىپ، شاباندوز تاڭداۋعا قاتىناسىپ كورۋگە بەكيدى.

    «بولام دەگەن بالانىڭ بەتىن قاقپا بەلىن بۋ» دەگەندەي ونىڭ بۇل ويىنا اناسى دا قوسىلىپ، جانى سۇيگەن اۋەسىنەن ناتيجە شىعارۋعا جىگەر بەرەدى. ءسويتىپ، ول اناسىنىڭ اق باتاسىن الىپ، اۋىلدان اتتانىپ بارعان جەردە شاباندوزدىققا تاڭدانىپ 7 اي كاسىپتىك تاربيە الادى. بۇل ورىندا ول تەك عانا بايگە اتقا مىنەتىن شاباندوز عانا بولعاندىقتان ات ونەرىنىڭ باسقا تۇرلەرىن ۇيرەنۋگە مۇمكىندىگىنىڭ جوق ەكەندىگىن بىلگەن سوڭ، سول جىلى قىركۇيەك ايىندا حۋبەي ولكەسىنىڭ ۋحان قالاسىنداعى مەملەكەتتىك بايگە ات باپتاۋ كلوبىنا بارىپ، شاباندوز بولىپ قابىلدانادى.

    وسى ورىنعا بارعان سوڭ ونداعى ات باپكەرى امەريكاعا قونىس اۋدارعان 60 جاستاعى شياڭگاڭدىق جىڭ كاڭيى دەگەن كىسى ءالمجاننىڭ ات ونەرى جاعىنداعى ورەسىنىڭ جوعارى ەكەندىگىن بايقاپ، ونى شاباندوز جانە بايگە ات باپكەرى بولۋعا تاربيەلەيدى.

    مىنە وسى ورايدا ءالىمجان تالاي دۇبىرلى جارىستادا شاباندوز بولىپ، ءبىر جاعى ۇستازىمەن بىرگە ات باپتاپ، كوزگە تۇسەدى.

    2012- جىلى ساۋىردە مەملەكەتتىك 1- دارەجەلى سايگۇلىك باپتاۋشسى اتاعىن العان ۇرىمجىلىك تاڭ ۋي دەگەن حانزۋ ازامات ءالىمجاندى ۇسىنىسپەن شينجياڭعا الىپ كەلىپ، مامىر ايىندا جۇڭحۋا مادەنيەت ساياحاتى جانە بۇراتالاداعى موڭعۇل ۇلتىنىڭ ءداستۇرلى نادام ساحارالىق ساۋىعىنداعى شەتەل تازا قاندى جىلقى جارىستارىندا باس شاباندوزدىققا شىعارادى.

    سول رەتكى جارىستا ءالىمجان مىنگەن ءۇش بايگە بابىنا ءمىنىسى باپ كەلىپ ءۇش تۇردەن التىن مەدال الادى. مىنە وسىدان باستاپ ءالىمجاننىڭ شاباندوزدىق يكەمى مەن بايگەنى باپتاۋ جاعىنداعى كەيبىر ادىستەرى بارلىق بايگە ات كلوپتارىنداعى كاسىپتىك باپكەرلەردىڭ نازارىن اۋدارىپ، ونىڭ اتاعى اسپانداي تۇسەدى. ىلە- شالا سول جىلى ماۋسىم ايىندا ناراتتا وتكەن مەملەكەتتىك ات بايگە جارىسنىڭ شەتەل تازا قاندى جىلقى جارىسىندا ءالىمجان مىنگەن اتتارى تاعى مىڭ جانە 2 مىڭ مەتر جارىس تۇرىندە التىن مەدال الادى. سول جازدا جانە موڭعۇلكۇرە تۇلپار حالىقارالىق ساياحات مەرەكەسى، شەتەل تازا قاندى جىلقىسنىڭ التىن مەدەلعا تالاسۋ جارىسى جانە «ات ونەرى پاتشالىعى اتاعىنا» تالاسۋ جارىستارىندا ول مىنگەن اتتار 2، 3 مىڭ مەتر جارىس تۇرىندە ءبىرىنشى بولىپ قوس التىن مەدال الىپ، «ات ونەرى پاتشالىعى» جۇلدەسىن جەڭىپ الىپ، ءالىمجان شينجياڭ بويىنشا 1- دارەجەلى شاباندوز اتاعىنا يە بولادى. سودان كەيىن چىڭدۋ قالاسىندا، ۋحاندا وتكەن ەكى رەتكى مەملەكەتتىك جارىس تۇرىندە التىن مەدال الىپ، بۇكىل جۇڭگو بويىنشا ۇزدىك شاباندوز اتاعىن الادى. مىنە وسىلاي اتاعى اسپانداي تۇسكەن بالا باپكەر، بايىپتى شاباندوز 2016-، 2017- جىلى ماۋسىم ايىندا كۇنەس اۋدانى نارات ساحاراسىندا وتكىزىلگەن ەكى رەتكى شەتەل تازا قاندى جىلقىسىنىڭ 5 مىڭ مەترگە شاۋىپ، 500 مىڭ يۋاندىق سيلىق اقشاعا تالاسۋ باسەكە جارىسىندا ارت- ارتىنان ءبىرىنشى بولىپ، رەكورد جاراتادى. وسى داڭقتارمەن ءالىمجان اتى زاتىنا ساي تۇلپار مەكەنىنەن شىققان بۇكىل جۇڭگوعا تانىمالى ايگىلى شاباندوزعا اينالادى.

    ءيا، ايگىلى عالىم ەديسون «ەگەر تابىسقا جەتەمىن دەسەڭ تاباندىلىقتى دوس، تاجىريبەنى اقىلشى، ساقتىقتى كۇش، ۇمىتتى قاراۋىل ەت!» دەگەنىندەي ءالىمجاننىڭ بۇدان بىلاي ەسەلەگەن قۇلشىنىسىنىڭ قۇدىرەتىمەن ءتىپتى دە بيىك بەلەستەردەن كورىنىپ، ات باپتاۋ سىندى ونەردىڭ بەدەلىن بيىكتەتە بەرۋىنە قارا ورمانداي حالقى اتىنان ۇكىلى ءۇمىت ارتامىز!

جاۋاپتى رەداكتور:سايراش تۇرارجان قىزى