بيدايعا وراق قويىلدى

    ەركىنبەك وكەن ۇلى حابارلايدى. نىلقى اۋدانىنىڭ ءارقايسى اۋىل-قالاشىق، فەرمالارىنداعى 230 مىڭ مۋ جەردەگى بيدايعا وراق قويىلدى.

    كومبايىندار ءبيداي ورۋدىڭ قاربالاستىعىنا ءتۇسىپ، ءبيداي اتىزى قىزۋ ەڭبەك دۋمانىنا شومدى. ءار جىلى ءبيداي ەگىمشىلىگىمەن شۇعىلدانىپ كەلە جاتقان نىلقى اۋدانى كوكحۇتحۇر موڭعۇل اۋىلىندا تۇراتىن ما ۋەيجۇڭ بيىل ءبيدايدان مول ءونىم الدى. كومبايىننان توگىلگەن التىن ءداندى كورگەن ونىڭ جۇزىنەن قۋانىشتىڭ لەبى ەستى.

    ما ۋەيجۇڭ ءوزىنىڭ قۋانىشتى كوڭىل-كۇيىن بىلايشا جەتكىزدى: «بيىل ءوزىمنىڭ ەگىستىك جەرىممەن قوسا مايعا العان 3000 مۋ جەرگە ءبيداي ەكتىم. بيىلعى ءونىم جاقسى، بىلتىر ءتۇرلى جاراتىلىستىق اپاتى تۋىلىپ، ءبيدايدىڭ ءتۇسىمى ازايعان ەدى. بيىل بۇرشاق، بوران اپاتى سياقتى اپات تۋىلمادى. ءبيدايدى جيناپ الا-سالا ورنىنا باسقا داقىل ەگۋدى جوسپارلاپ وتىرمىن. قازىرگە دەيىن 2000 مۋ جەردىڭ ءبيدايى ورىلىپ بولدى. بۇگىن ەڭ سوڭعى كۇنى».

    استىقتىڭ تولىق قامبالانۋىنا كەپىلدىك ەتۋ ءۇشىن، نىلقى اۋدانى ەرتە ىسكە كىرىسىپ، دايىندىق قىزمەتتەرىن مۇقيات ىستەپ، جان-جاقتى ورنالاستىرۋ جاساپ، كومباين، تراكتور سىندى ەگىس ماشينالارىن الدىن الا رەمونتتادى ءارى استىق ساتىپ الۋعا، اۋىل شارۋاشىلىق زاتتىق بۇيىمدارى مەن اۋىل شارۋاشىلىق ماشينالارىن ساتىپ الۋعا قاتىستى ءتيىمدى ساياساتتاردى قاتاڭ اتقارىپ، شارۋالاردى استىقتى ۋاعىندا جيناپ الۋمەن بىرگە، ۋاقىتتى مىقتى يگەرىپ، قايتا داقىل ەگۋگە جىگەرلەندىرىپ، استىقتى جيناپ الۋ مەن قايتا داقىل ەگۋ جۇمىسىنىڭ ءساتتى ورىستەتىلۋىنە كەپىلدىك ەتتى.

    نىلقى اۋدانى كوكحۇتحۇر اۋىلى استىق پۋنكتىنىڭ باستىعى تىلەۋبەك سىدىق ۇلى: اۋىلىمىز بيىل 20 مىڭ مۋدان استام جەرگە ءبيداي ەكتى. قازىر جازعى جيىن-تەرىن جۇمىسى قاربالاس جۇرىلۋدە، ەگىس ماشينالارىن بۇكىلدەي ىسكە قوسىپ، جازعى جيىن-تەرىن جۇمىسىنىڭ ءساتتى ورىستەتىلۋىنە كەپىلدىك ەتتىك. جازعى استىق ساتىپ الۋدىڭ الدىنداعى دايىندىق قىزمەتتى اياقتاتىپ، بوس قويمالاردى ديزەنفەكسيالاپ، تەكسەرۋشى جانە باسقارۋ قىزمەتكەرلەرىن قىزمەتكە شىعۋ الدىنداعى تاربيەگە ۇيىمداستىردىق، ءتۇرلى قاتىستى ماشينا جابدىقتارىن جوندەپ، سيىمدىلىق ولشەۋىش، سۋ قۇرامىن ولشەۋ اسپابى، تارازى سياقتىلاردى وبلىستىق ساپانى تەحنيكالىق جاقتان باقىلاۋ مەكەمەسىنىڭ تەكسەرۋىنەن وتكىزۋ ارقىلى استىق ەگىمشىلىگىمەن شۇعىلداناتىن ديقانداردىڭ ءبىر جاعىنان استىق تاپسىرۋ، ءبىر جاعىنان ساتقان استىعىنىڭ اقشاسىن الۋىنا كەپىلدىك ەتىپ، «اق تالون» جاعدايى تۋىلۋىن باتىل تەجەپ، جازعى استىقتى ساتىپ الۋ قىزمەتىنىڭ تىڭعىلىقتى جۇرگىزىلۋىنە كەپىلدىك ەتتىك،-دەدى.

    ۇعىسۋعا قاراعاندا، بيىل نىلقى اۋدانىنىڭ ءبيداي ەگىلگەن جەر اۋماعى 230 مىڭ مۋ بولىپ، كەزەكتە ءبيداي جيناۋدىڭ قاربالاس مەزگىلىنە وتكەن. جازعى استىق ساتىپ الۋ ديقاندار مۇددەسىنە، ەكونوميكا قوعام دامۋ بەتالىسىنا سايادى، ديقانداردىڭ رازىلىقپەن مەملەكەتتىڭ ساپا ولشەمىنە ۇيلەسەتىن ءبيدايدى تاپسىرۋى ءۇشىن، نىلقى اۋدانى ءارقايسى استىق ساتىپ الۋ كاسىپورىندارىنىڭ تاۋار استىق قامباسىن بوساتۋ تەبىنىن ارتتىرىپ، جازعى استىق ساتىپ الۋ قاراجاتىن، ماشينالاردى جوندەۋ سياقتى شارالاردى ەرتە باستان تياناقتاندىرىپ، قامبانىڭ پايدالانۋ مولشەرىن جوعارىلاتقان.

    بيىل جازعى استىق جيناپ الۋدا استىق ساتىپ الۋ تىكە قوسىمشا قاراجات بەرۋ ساياساتى جالعاستى اتقارىلىپ، جاڭا استىق بازارعا شىعارىلعاننان باستاپ رايونىمىزداعى 3-سورتتى ءبيدايدىڭ ءار كيلوگرامى ەڭ تومەن بولعاندا 2.36 يۋاننان ساتىپ الىنادى ەكەن.

    ءتىلشىنىڭ قىزمەت ورنى: نىلقى اۋدانى مىس اۋىلى پارتكوم ۇگىت كەڭسەسى

جاۋاپتى رەداكتور:سايراش تۇرارجان قىزى