جاڭا كاسىپ كوزى — دونەر كاۋابى

    جۇماجان بەگزاتقان ۇلى حابارلايدى. تۇسكى ۋاقىتتا ايماقتىق 2-ورتا مەكتەپ قاقپاسىنىڭ باتىس جاعىنداعى دونەر كاۋاپحاناسىنا بارا قالساڭىز، ۇستەل تولى دونەر كاۋابىن جەپ وتىرعاندار مەن قالتالاپ الىپ كەتىپ جاتقانداردى كورەسىز. بۇل دونەر كاۋابىنىڭ ىسكەر  جىگىتىمىز ازامات مەدەلقان ۇلىنىڭ قولىنان شىعىپ جاتقانىن كوپتەگەن ادامدار بىلمەسە كەرەك.

    ازامات مەدەلقان ۇلى شاۋەشەك قالاسىنىڭ تۇرعىنى، ول 2010-جىلى ايماقتىق 2-ورتا مەكتەپتەن تولىق ورتانى تاۋىسىپ، 3 جىل شينجياڭ ساقشى مەكتەبىن وقيدى. ول وقۋ بىتىرگەن سوڭ قوعامدا ساۋكىلدەپ بوس ءجۇرىپ، اتا-اناسىنىڭ تاپقان تابىسىمەن كۇنەلتۋدى نامىس كورىپ، ءبىر ونەردىڭ تەتىگىن يگەرىپ، بازارعا ويىسۋدى ويلاپ، ءار ونەردى باعامداپ كورەدى.

    بازار ارالاي ءجۇرىپ، بازاردا ەڭ ءوتىمدى، جاڭا تاماق ءتۇرى دونەر كاۋابىن ۇيرەنۋدى تاڭداپ، وزىنە ۇستاز ىزدەگەن ول، 2014-جىلى قازاقستانعا بارىپ، ارناۋلى ۇستازدىڭ تاربيەسىندە دونەر كاۋابىن پىسىرۋدى ۇيرەنىپ، دونەر كاۋابىن پىسىراتىن اسپاپتىڭ قىرى مەن سىرىن جەتتىك يگەرىپ، تۋعان اۋىلىنا قايتادى.

    « ۇستازى جاقسىنىڭ ۇستامى جاقسى» دەمەكشى، قىسقا عانا ۋاقىت ىشىندە ۇيرەنگەن ءبىلىمىن كادەگە جاراتۋدى ويلاعان ازامات 35 مىڭ يۋانعا ءبىر اۋىزدى ءۇيدى ءبىر جىلعا مايعا الىپ، 8 مىڭ يۋانعا تاۋىق پەن سيىر ەتىن قاقتايتىن زالالسىز، ىسسىز ەكى قاقتاۋ اسپابىن ساتىپ الىپ، جەكە دونەر كاۋاپحاناسىن اشادى.

    «شەشىنگەن سۋدان تايىنبايدى» دەمەكشى، ول ەندىگى جەردە تاڭمەن تالاسىپ، كۇنمەن جارىسىپ جۇمىس ىستەپ، كاۋاپحانانىڭ ساۋداسىن جانداندىرۋمەن بىرگە، تاماق ساپاسىن دا جاقسارتىپ، قاريدارلارىن كۇن سايىن مولايتىپ، ونەرىن ۇشتاي باستايدى، قىسقا عانا جارىم جىل ىشىندە زالالسىز، ىسسىز، ءدامى ءتىل ۇيىرەتىن دونەر كاۋابىن جاساپ، قاريدارلارىنا سەنىمىن ارتتىرىپ، ءوزىنىڭ كوپتەن كۇتكەن ارمانىنىڭ داڭعىل جول العانىنا ءدان ريزا بولدى.

    قاشاندا تابانداپ ىستەگەن تاۋدى دا كوشىرەدى ەمەس پە؟ ازاماتتىڭ بۇل كاسىپتى تاڭداپ، ۇيرەنىپ، دۇكەن اشىپ، بۇگىنگىدەي قاريدار تاۋىپ، ساۋداسىن شالقىتىپ، قىرى مەن سىرى قيىن كاسىپتى ءتورت اياعىنان تىك تۇرعىزىپ، جۇرگىزىپ كەتۋىنىڭ ءوزى ۇلكەن جاۋاپكەرشىلىكتى، تاباندىلىقتى تالاپ ەتەدى. ءيلايىم وسىنداي جاستار مولايسا ءاربىر اتا-انانىڭ اۋىرتپالىعى جەڭىلدەر ەدى. ونىڭ قازىرگى ايلىق تازا كىرىسى 5 تە 6 مىڭ يۋان اينالاسىندا بولىپ، تاجىريبەسى دە مولايا تۇسكەن.

    ازامات مەدەلقان ۇلى تىلشىگە: «دونەر كاۋابى ۇزاق جىلدىق تاريحقا يە، ازىقتىق قۋاتى جوعارى، زالالسىز، ىسسىز پىساتىن تاعام، دەنساۋلىققا پايدالى، زيانى جوق. الدىمەن تاۋىق ەتىن قاقتاپ پىسىرىپ، ونان سوڭ ۇساقتاپ تۋرايمىز، قيار، ءسابىز، كارتوپ، كاپۋستانى ۇساقتاپ تۋرايمىز، ونان سوڭ بارلىعىن ارالاستىرىپ، وسىمدىك مايى مەن قىزاناق قويمالجىڭىن قۇيىپ، جۇقا يلەنگەن شەلپەككە وراپ، جىلىتۋ جابدىعىندا 2 مينۋت جىلىتىپ، قاريدارعا بەرەمىز، جەسەڭىز ءدامى ءتىل ۇيىرەدى، سوندىقتان دا بۇل تاعامنىڭ قاريدارى مول»،-دەدى.

    ءيا، بۇگىنگى عىلىم-تەحنيكا دامىعان، قاجەتسىنۋ ارتقان تاماشا زاماندا ءتۇرلى تەحنيكا، ءتۇرلى ونەر يگەرىپ، ءوز كۇشىنە سۇيەنىپ، ەڭبەك ەتىپ، وتانعا، وتباسىنا تاماشا تابىس سيلاعان زامانعا ساي جاستار كوبەيدى، مىنە سونىڭ ءبىرى ازامات مەدەلقان ۇلى. ول ءوز كۇشىنە، ءوز ونەرىنە سۇيەنىپ ەڭبەك ەتىپ، تابىس جاراتتى، ءوز قاتارلاستارىنا ۇلگى بولدى، ازاماتتان ۇيرەنۋگە تاتيدى. قوعامدا قانشالاعان جاستار وزدەرى ەڭبەك ەتپەي، كۇندىز-ءتۇنى دەسكاتيكادا، توراپحانادا جانە بيلياردحانالاردا ءجۇرىپ، اتا-اناسىنىڭ تابان ەت، ماڭداي تەرىمەن تاپقان ەڭبەكاقىلارىن سۋشا شاشىپ ءجۇر. ونىمەن قويماي ايگىلى ماركاداعى كيىم كيىپ، اتا-اناسىنا ماسىل بولىپ، قوعامنىڭ اۋىرتپاشىلىعىنا اينالدى. وسىنىڭ بارلىعى بىزگە تاجىريبە ساباق. جاراسىمدى قوعام ەڭبەككەر، ىسكەر، ءبىلىمدى ادامدارعا مۇقتاج. سوندىقتان قوعام ءۇشىن، وتباسى ءۇشىن، نۇرلى بولاشاق ءۇشىن جالىقپاي ەڭبەك ەتىپ، جاراسىمدى قوعامدا جارامدى ازامات بولايىق.

ءتىلشىنىڭ قىزمەت ورنى: تارباعاتاي گازەتى مەكەمەسى 

جاۋاپتى رەداكتور:سايراش تۇرارجان قىزى