قازاقستان پرەزيدەنتى شىعارمالار جيناعىنىڭ تۇساۋ كەسەرى بەيجيڭدە وتكىزىلدى

    29 – ماۋسىم كۇنى تۇستەن بۇرىن قازاقستان رەسپۋبليكاسىنىڭ جۇڭگودا تۇراتىن ەلشىحاناسى مەن جۇڭگو قوعامدىق عىلىمدار اكادەمياسى بىرلىكتە «نازاربايەۆ شىعارمالار جيناعىنىڭ» اقپار جاريالاۋ جينالىسىن وتكىزدى. قازاقستاننىڭ جۇڭگودا تۇراتىن باس ەلشىسى شاحرات نۇرىشەۆ، سىرتقى ىستەر مينيسترلىگى ەۆروپا – ازيا مەڭگەرمەسىنىڭ باستىعى سۇن لينجياڭ، قوعامدىق عىلىمدار اكادەمياسى رەسەي - شىعىس ەۆروپا، ورتا ازيا زەرتتەۋ ورنىنىڭ باستىعى لي يۇڭچۋان، حالىق باسپاسى باستىعىنىڭ كومەكشىسى لي شۇنشىڭ قاتارلىلار اتالعان ءىسشاراعا قاتىناستى ءارى ءسوز سويلەدى. بۇدان سىرت، شاڭحاي سەلبەستىك ۇيىمىنىڭ باس حاتشىسى اليموۆ، تۇركمەنستاننىڭ جۇڭگودا تۇراتىن باس ەلشىسى شىنار ۇرىستەموۆا جانە باسقا مەملەكەتتەر ەلشىلىگىنىڭ ۋاكىلدەرى، جۇڭگو مۇناي سەرىكتىگىنىڭ ۋاكىلى اتالعان ءىسشاراعا قاتىناستى.

    ۇعىسۋعا قاراعاندا، اتالعان جيناقتى قوعامدىق عىلىمدار اكادەمياسى رەسەي - شىعىس ەۆروپا، ورتا ازيا زەرتتەۋ ورنى، جۇڭگو مۇناي، تابيعي گاز توبى قازاقستان سەرىكتىگى، قازاقستاننىڭ تۇڭعىش پرەزيدەنتى - ەلباسىنىڭ كىتاپحاناسى مەن قازاقستاننىڭ جۇڭگودا تۇراتىن ەلشىحاناسى بىرلىكتە سەلبەسىپ، جيناپ رەتتەپ ءارى پرەزيدەنت نازاربايەۆدىڭ قاتىستى قۇجات – ماتەريالدارىن اۋدارىپ، حالىق باسپاسى باسىپ تاراتقان.

    اتالعان كىتاپتا پرەزيدەنت نازاربايەۆتىڭ قازاقستان حالقىن باستاپ تاۋەلسىز ەگەمەندى ەل قۇرۋ بارىسى، ۇلتتىق ەكونوميكانى دامىتۋ، حالىقارالىق قارىم – قاتىناستى نىعايتۋ، جۇڭگو – قازاقستان قاتىناسىن دامىتۋ جاعىنداعى ۋاكىلدىك سيپاتتى ماقالالارى، لەكسيالارى مەن ەل جاعدايىنان باياندامالارى قامتىلىپ، جۇڭگو حالقىنىڭ قازاقستان پرەزيدەنتىن ىشكەرىلەي تۇسىنۋىندە ماڭىزدى قۇجاتپەن قامدادى.

جاۋاپتى رەداكتور:اقىن ادەنوۆ