مەملەكەتتىك 12 – كەزەكتى حالىق قۇرىلتايى تۇراقتى كوميتەتىنىڭ 28 – ءماجىلىسى بەيجيڭدە جابىلدى

    مەملەكەتتىك 12 – كەزەكتى حالىق قۇرىلتايى تۇراقتى كوميتەتىنىڭ 28 – ءماجىلىسى 27 – ماۋسىم تۇستەن كەيىن بەيجيڭدەگى حالىق سارايىندا جابىلدى. ماجىلىستە داۋىسقا سالۋ ارقىلى مەملەكەتتىڭ مالىمەت زاڭى، سۋدىڭ لاستانۋىنان ساقتانۋ زاڭىنا وزگەرىس ەنگىزۋ جونىندەگى قاۋلى، ازاماتتىق ىستەر ارىز – شاعىم زاڭى مەن اكىمشىلىك ارىز – شاعىم زاڭىنا وزگەرىس ەنگىزۋ جونىندەگى قاۋلى ماقۇلداندى؛ چىن جينيڭدى ورتانى قورعاۋ مينيسترلىگىنىڭ مينيسترى مىندەتىنەن الۋ، لي گانجيەنى ورتانى قورعاۋ مينيسترلىگىنىڭ مينيسترى ەتىپ تاعايىنداۋ، چىن جىڭگاۋدى تۇرعىن ءۇي جانە قالا قۇرىلىسى مينيسترلىگىنىڭ مينيسترى مىندەتىنەن الۋ، ۋاڭ مىڭحۇيدى تۇرعىن ءۇي جانە قالا قۇرىلىسى مينيسترلىگىنىڭ مينيسترى ەتىپ تاعايىنداۋ ۇيعارىلدى، بۇلار مەملەكەت ءتوراعاسى شي جينپيڭنىڭ 69 -، 70 -، 71 -، 72 – ءتوراعا بۇيرىقتارىنا قول قويۋىمەن جاريالاندى. كوميتەت باستىعى جاڭ دىجياڭ ءماجىلىستى باسقاردى.

    تۇراقتى كوميتەتتىڭ قۇرامىنداعى 149 ادام ماجىلىسكە قاتىناستى، قاتىناسقان ادام سانى زاڭدا بەلگىلەنگەن ادام سانىنا ۇيلەستى.

    ماجىلىستە داۋىسقا سالۋ ارقىلى «ورتا ازيا ءوڭىرىنىڭ ەكونوميكا ىنتىماقتاستىعى ينستيتۋتىن قۇرۋ جونىندەگى كەلىسىمدى» بەكىتۋ جونىندەگى قاۋلى، «جۇڭحۋا حالىق رەسپۋبليكاسى مەن ارگەنتينا رەسپۋبليكاسىنىڭ سوتتالعان قىلمىستىلاردى الماستىرىپ باسقارۋ شارتىن» بەكىتۋ جونىندەگى قاۋلى، «جۇڭحۋا حالىق رەسپۋبليكاسى مەن ەفيوفيا فەدەراتسيالىق - دەموكراتيالىق رەسپۋبليكاسىنىڭ سوتتالعان قىلمىستىلاردى الماستىرىپ باسقارۋ شارتىن» بەكىتۋ جونىندەگى قاۋلى ماقۇلداندى.

    ماجىلىستە داۋىسقا سالۋ ارقىلى مەملەكەتتىك حالىق قۇرىلتايى تۇراقتى كوميتەتىنىڭ 2016 – جىلعى ورتالىقتىڭ سوڭعى ەسەبىن بەكىتۋ جونىندەگى قاۋلىسى ماقۇلداندى، 2016 – جىلعى ورتالىقتىڭ سوڭعى ەسەبى بەكىتىلدى. ماجىلىستە تاعى داۋىسقا سالۋ ارقىلى مەملەكەتتىك حالىق قۇرىلتايى تۇراقتى كوميتەتى ۋاكىلدەر تولىمدىلىعىن تەكسەرۋ كوميسسياسىنىڭ ءىشىنارا ۋاكىلدەردىڭ ۋاكىلدىك تولىمدىلىعى جونىندەگى بايانداماسى ماقۇلداندى.

    ماجىلىستە تاعى باسقا دا مىندەتكە تاعايىنداۋ، مىندەتىنەن قالدىرۋ ىستەرى داۋىسقا سالىندى.

جاۋاپتى رەداكتور:نۇرجان مينۋار قىزى