جىڭنان قۇلجا اۋدانىنا دەيىنگى جوعارى قارقىندى تاس جول نىسانى جۇمىس باستادى

    قۇلجا قالاسى مەن ءۇرىمجىنىڭ ارالىعى 170 كيلومەتر شاماسىندا قىسقارادى

    18 - ماۋسىمدا گۇرىلدەگەن ماشينا داۋىسى ىشىندە ىلە قازاق اۆتونوميالى وبلىسى تاريحىنداعى ەڭ كوپ قارجى قوسىلعان تاس جول نىسانى بولعان جىڭنان قۇلجا اۋدانىنا دەيىنگى G577 جوعارى قارقىندى تاس جول قۇرىلىس نىسانى جۇمىس باستادى. قۇرىلىس بىتكەننەن كەيىن ىلە وزەنى اڭعارىندا شىعىستان ەنگىزىپ، باتىسقا جونەلتەتىن تاعى ءبىر جوعارى قارقىندى تاس جول قوسىلىپ، قۇلجا قالاسى مەن ءۇرىمجىنىڭ ارالىعى 170 كيلومەتر شاماسىندا قىسقارادى.

    جىڭنان قۇلجا اۋدانىنا دەيىنگى جوعارى قارقىندى تاس جول جىڭ اۋدانىنداعى شاشانزىنىڭ باتىس وڭتۇستىگىنەن باستالىپ، G30 سايرام - كەڭساي جوعارى قارقىندى تاس جولىمەن تۇتاسىپ، قۇلجا اۋدانىنىڭ ءدوڭمازار اۋىلىنا بارادى، جالپى ۇزىندىعى 89.51كيلومەتر كەلەتىن وسى جوعارى قارقىندى تاس جولعا جيىنى 11 ميلليارد 100 ميلليون يۋان قارجى قوسىلاتىندىعى جوسپارلاندى. بۇل جول سالىنىپ بىتكەننەن كەيىن ىلە وزەنى اڭعارىنداعى ءارقايسى اۋدان، قالالار جوعارى قارقىندى تاس جولمەن جالعاسىپ، قالا تۇرعىندارى ۇرىمجىگە بارۋ ءۇشىن قۇلجا قالاسىنان شىعىستى بەتكە الىپ جولعا شىعىپ، جىڭ اۋدانىنان G30 جوعارى قارقىندى تاس جولعا شىقسا بولعانى، بۇرىنعىدان 170 كيلومەتر مولشەرىندە جولدى از باسىپ، ۇرىمجىگە تەز جەتىپ الۋىنا مۇمكىندىك جاسالدى.

    ەرەكشە جاعراپيالىق ورتانىڭ اسەرى سەبەبىنەن ىلە وزەنى اڭعارىندا سىرتپەن بايلانىس جاسايتىن جالعىز عانا جول بار بولاتىن، G30 سايرام - كەڭساي جوعارى قارقىندى تاس جولىنىڭ سالىنۋى ىلە وزەنى اڭعارىنىڭ قاتىناس قىسىمىن زور دارەجەدە باسەيتكەنىمەن، جەر كوشكىنى، لاي - شاعىل كوشكىنى، قار كوشكىنى سياقتى اپاتتاردىڭ ىقپالىنا ۇشىرايتىندىقتان، قاتىناس باسقارۋىنا الىناتىن جاعداي ءجيى تۋىلادى، ءار جىلى 40 − 50 رەت قاتىناس توسىلادى، ناشار اۋا رايى سياقتى شۇعىل جاعدايلارعا تاپ بولعاندا، ىلە وزەنى اڭعارىنداعى جەرلەردىڭ سىرتپەن بايلانىس جاسايتىن قاتىناس جولى مۇلدە ءۇزىلىپ قالادى.

    جىڭنان قۇلجا اۋدانىنا دەيىنگى جاڭادان سالىنىپ جاتقان وسى جوعارى قارقىندى تاس جول − ىلە وزەنى اڭعارى مەن سىرت جەردى بايلانىستىراتىن ەكىنشى جوعارى قارقىندى تاس جول مولشەرمەن 3 جارىم جىلدا سالىنىپ بولادى، ىلە قازاق اۆتونوميالى وبلىسى قاتىناس − تاسىمال مەكەمەسىنىڭ باستىعى يۇي جانجۇن بىلاي دەدى: «بۇل جول تەڭىز دەڭگەيىنەن تومەن بولعاندىقتان، قالىڭ تۇمان ءتۇسىپ، دۇلەي بوران سوعاتىن، مۇز قاتىپ، قار باسىپ قالاتىن اپاتتاردان اۋلاق، اۆتوكولىكتەردىڭ 24 ساعات ىركىلىسسىز قاتىناۋىن قامتاماسىز ەتۋگە بولادى، بۇل جول سالىنىپ بىتكەننەن كەيىن ىلە وزەنى اڭعارىنداعى تاعى ءبىر نەگىزگى جول بولماق».

    وسى كۇنى ىلە قازاق اۆتونوميالى وبلىسىنداعى G577 جوعارى قارقىندى تاس جولدىڭ تەكەستەن موڭعۇلكۇرەگە دەيىنگى بولىگىن وزگەرتىپ سالۋ قۇرىلىسى دا رەسمي جۇمىس باستادى.

جاۋاپتى رەداكتور:سايراش تۇرارجان قىزى