قوعام حاۋىپسىزدىگى مينيسترلىگى «مۇزداتىلعان ۇلتتىق مال – مۇلىكتىڭ توڭىن ءجىبتۋ» دەگەننىڭ بارلىعى الدامشىلىق ەكەنىن ەسكەرتتى

    شينحۋا اگەنتتىگى، 25 – مامىر، بەيجيڭ. ءتىلشىنىڭ 25 – مامىردا قوعام حاۋىپسىزدىگى مينيسترلىگىنەن ۇعىسۋىنشا، تاياۋدا قوعام حاۋىپسىزدىگى ورگاندارىنىڭ ءبىر تۇتاس جەتەكشىلىك ەتىپ ورنالاستىرۋىمەن تيانجين، بەيجيڭ، گۋاڭشي سياقتى جەرلەردەگى قوعام حاۋىپسىزدىگى تاراۋلارى تىزگىن ۇشىمەن قيمىلداپ، «حالىقتى اۋقاتتاندىرۋ قايىر – ساحابات باس شتابى» دەيتىن قۇرىلىمنىڭ «مۇزداتىلعان ۇلتتىق مال – مۇلىكتىڭ توڭىن ءجىبتۋ» دەگەن سىلتاۋمەن مۇشە قابىلداپ، الدامشىلىقپەن شۇعىلدانۋ قىلمىستى توبىن ءساتتى تالقاندادى، قازىرگە دەيىن 44 قىلمىس كۇدىكتىسى مەن «حالىقتى اۋقاتتاندىرۋ قايىر – ساحابات باس شتابىنىڭ» اتاماندارى ءارى وسى رەتكى «مۇزداتىلعان ۇلتتىق مال – مۇلىكتىڭ توڭىن ءجىبتۋ» الدامشىلىعىن ۇيىمداستىرىپ جوسپارلاعاندار تۇگەلدەي زاڭ تورىنا ءتۇستى.

    وسىعان وراي قوعام حاۋىپسىزدىگى ورگاندارى حالىق بۇقاراسىنىڭ الدانۋدان ساقتانۋ تانىمىن شىنايى كۇشەيتىپ، «مۇزداتىلعان ۇلتتىق مال – مۇلىكتىڭ توڭىن ءجىبىتۋ» دەگەنگە ساياتىن تۇرلەردىڭ بارلىعىنىڭ الدامشىلىق ەكەنىن، سەنە سالۋعا بولمايتىنىن، الدانعانداردى بايقاسىمەن دەرەۋ قوعام حاۋىپسىزدىگى ورگاندارىنا مالىمدەۋلەرىن ەسكەرتتى.

    وسىدان بۇرىن توراپتا «حالىقتى اۋقاتتاندىرۋ قايىر – ساحابات باس شتابىنىڭ» قىزمەتكەرلەرى «مۇزداتىلعان ۇلتتىق مال – مۇلىكتىڭ توڭىن ءجىبىتۋ» اتىمەن مۇشە قابىلدايتىنىن ءارى «قۇس ۇياسى دەنە تاربيە كەشەنىندە قايىر – ساحابات قيمىلى وتكىزىلەدى، بۇعان قاتىناسقاندار 50 مىڭ يۋان الادى» دەپ، ۇيىمعا مۇشە بولعانداردى بەيجيڭ قالاسىنداعى حالىقارالىق دەنە تاربيە الاڭى سياقتى الاڭدارعا باس قوسۋعا ۇيىمداستىرۋ جونىندەگى ينفورماتسياسى تارالادى. تەكسەرۋ ارقىلى «حالىقتى اۋقاتتاندىرۋ قايىر – ساحابات باس شتابىنىڭ» باستى ۇيىمداستىرۋشىلارىنىڭ چىن، يىڭ فاميليالىلار ەكەن انىقتالدى.

    وسى دەلودا زاڭسىز ەلەمەنتتەر جۇڭحۋا ۇلتتارىنىڭ تاريحىنداعى ءارقايسى پاتشالىقتار جويىلعاننان كەيىن ءارى گومينداڭ ويسىراي جەڭىلىپ تايۋانعا قاشقاندا ۇلى قۇرلىق پەن شەتەلدەردە زور مولشەردەگى بايلىق ساقتالىپ قالعان بولاتىن، مەملەكەتىمىز قازىر كەيبىر حالىقتىق ۇيىمدار مەن كاسىپورىندارعا شەتەلدەردەگى وسى «ۇلتتىق مال – مۇلىكتەردىڭ» مۇزداتىلعان توڭىن ءجىبىتۋدى تاپسىرىپ وتىر دەگەندى جەلەۋ ەتىپ، زيانعا ۇشىراۋشىلاردى قاراجات تاپسىرۋعا، مۇشەلىك تىزىمدەلۋ اقىسى نەمەسە جارناعا قارجى قوسۋ سىندى فورمالارمەن الدامشىلىق ىستەگەن، سونىمەن بىرگە، «ۇلتتىق مال – مۇلىكتىڭ» توڭى جىبىگەننەن كەيىن، قارجى قوسىپ قولداپ – قۋاتتاعاندارعا قوماقتى قارىمجى بەرىلەتىندىگىن ۋادە ەتىپ، الدانعانداردى تىنباي كەمىرە بەرگەن.

جاۋاپتى رەداكتور:نۇرجان مينۋار قىزى