جۇرەك سىرىن شەرتە ءبىلىڭىز

    جاڭادان نەكەلەنگەن ايەل اتا - ەنەسىمەن بىرگە وڭجاقتا تۇرىپتى. ءبىر كۇنى توڭازىتقىشتا تۇرعان جەمىستى كورىپتى دە، جەمىس ەزەتىن اسپاپقا سالىپ، جەمىس ەزىپ قويىپتى. مۇنى كورگەن ەنەسى كەسەدەگى شىرىننان ارت - ارتىنان بىرنەشە قالاق ءىشىپ جىبەرىپ، ءدامى قانداي ءتىل ۇيىرەدى،- دەپ ماقتاپتى.

    مۇنداي ماقتاۋدى ەستىگەن كەلىن ەنەسىنە ارناپ، ۇدايى جەمىس شىرىنىن جاساپ، كەسەگە قۇيىپ توڭازىتقىشقا قويادى. اركۇنى ىستەن ءتۇسىپ كەلگەندە، كەسەنىڭ بوس تۇرعانىن كورىپ ىشتەي قاتتى قۋانىپ جۇرەدى.

    ءبىر كۇنى ول كۇندەگىدەن ەرتە ۇيىنە كەلسە، ەنەسىنىڭ اسحانادا بار پەيىلىن سالىپ جاساعان جەمىس شىرىنىن تۇگەلىمەن سۋ ناۋاسىنا توگە سالعانىن كورىپ، ىشتەي قاتتى كۇيزەلىپتى. ول: ەنەم مەنى جاقتىرمايتىن كورىنەدى، ويتپەگەندە بۇلاي ىستەمەس ەدى،- دەپ ويلاپتى.

    ول سودان باستاپ جەمىس شىرىنىن دايىندامايتىن، ءتىپتى ەنەسىنىڭ الدىندا سەكەمشىل بولا باستاپتى. ەنەسى شىنى جۋىپ جاتىپ اقىرىن سىلدىر ەتكىزسە دە، ماعان كورسەتكەن قىرى دەپ ءبىلىپ، ەنەسى بۇگىن بوران قاتتى ەكەن دەپ قالسا، ماعان ءۇيدى جاقسى تازالاماپسىڭ دەگەنى شىعار،- دەپ سەزىكتەنىپتى.

    ءبىر كۇنى كۇيەۋى: شەشەم ەكەۋىڭنىڭ ورتالارىڭدا ءبىر ءىس بولدى ما؟ شەشەمنىڭ ايتۋىنشا بۇرىن سەن وعان جەمىس شىرىنىن دايارلاپ بەرەدى ەكەنسىڭ، ال قازىر دايارلامايتىن بولىپسىڭ، نەگە؟ - دەپ سۇرايدى. سوندا ايەلى كوز جاسىن كولدەتىپ، بولعان ءىستى باستان - اقىر كۇيەۋىنە ايتىپتى.

    كۇيەۋى ايەلىن ەرتىپ شەشەسىنەن نە ءۇشىن جەمىس شىرىنىن سۋ ناۋاسىنا توگە سالعانىن سۇراپتى. سوندا شەشەسى: توككەم جوق،- دەيدى. كەلىنى: اپا، ءبىر كەسە جەمىس شىرىنىن سۋ ۋانناسىنا توكتىڭىز عوي، ءوز كوزىممەن كورگەم، - دەيدى. ەنەسى ويلانا كەلە: ە، ەسىمە ەندى كەلدى، انا جولى جەمىس شىرىنىنا ءبىر تال شىبىن ءتۇسىپ كەتكەن ەكەن، ىشۋگە بولمايتىن بولعان سوڭ سۋ ناۋاسىنا اپارىپ توككەن ەدىم، - دەپ سول كۇنگى ءىستى باياندايدى.

    مىنە ءبىر شىبىننىڭ اسەرىنەن ەنە مەن كەلىن اراسىندا كىربەڭدىڭ تۋىلدى، ەكەۋىنىڭ بالداي ءتاتتى بايلانىستارى بۇزىلۋعا اينالدى. بۇل ىستەن كەيىن كەلىنى: سونشا ۋاقىت ويلانىپ جۇرگەنشە، سول كۇنى ەنەم شىرىندى توككەن كەزدە نەگە سەبەبىن انىقتاپ سۇرامادىم؟ ويتپەگەندە مۇنداي اعاتتىق بولماۋشى ەدى! - دەپ وكىنەدى.

    ادام جالعىز كۇيزەلۋگە، ەگىلىپ جىلاۋعا، اشۋلانۋعا بارسا دا، ءىستىڭ سەبەبىن تەكتەپ، ءتۇسىنىپ جاتپايدى. ادام عاجايىپ حايۋانات، ۇنەمى تۇسىنىكسىز ويىن ويناپ، ءوز ويىمەن تۇجىرىم جاساپ، كەي ءىستىڭ اق - قاراسىن ايىرماستان، رەنجىپ جۇرەدى. »كەڭ بولساڭ، كەم بولمايسىڭ«، »كەڭەسپەن پىشكەن تون كەلتە بولماس« دەگەندەي، كەڭەسۋگە بولاتىن ءىستى دەر كەزىندە سۇراپ، ءتۇسىنىسۋ، شەشىلۋىن كۇتىپ وتىرماۋى ءتيىس.

    اۋدارعان: گۇلبان ساقاناي قىزى

    (شينجياڭ عىلىم – تەحنيكا گازەتىنەن)

جاۋاپتى رەداكتور:سايراش تۇرارجان قىزى