لي كىچياڭ مەملەكەتتىك كەڭەستىڭ ۇنەمىلىك ىستەر ءماجىلىسىن باسقارىپ اشتى

    مەملەكەتتىك كەڭەستىڭ زۇڭليى لي كىچياڭ 19 – ساۋىردە مەملەكەتتىك كەڭەستىڭ ۇنەمىلىك ىستەر ءماجىلىسىن باسقارىپ اشىپ، باجىنى اناعۇرلىم ازايتۋ شاراسىن ورتاعا شىعارۋدى، ناقتى شارۋاشىلىقتىڭ وزىندىك قۇنىن تومەندەتىپ، ارتۋ تەبىنىن باياندى ىلگەرىلەتۋدى ۇيعاردى؛ «جۇڭحۋا حالىق رەسپۋبليكاسىنىڭ الەۋمەتتىك كىتاپحانا زاڭىن (جوبا نۇسقا)» ماقۇلدادى.

    ءماجىلىس مىنالاردى اتاپ كورسەتتى: «ۇكىمەت قىزمەتىنەن باياندامانىڭ» ورنالاستىرۋىنا ساي باجى ءتۇزىمى رەفورماسىن تەرەڭدەتىپ، باجىنى كەمەيتۋ سالماعىن ارتتىرۋ، بازاردىڭ تۇلعالىق اۋىرتپالىعىن تىنباي جەڭىلدەتۋ قامداۋ جاعىنداعى قۇرىلىمدىق رەفورمانى ىشكەرىلەي جۇرگىزۋدىڭ ماڭىزدى شاراسى سانالادى، ول ىشكى – سىرتقى ورتا قىم – قۋىت بولىپ وتىرعان، ورنىقسىز، تۇراقسىز فاكتورلار ءالى دە ءبىرشاما كوپ بولىپ وتىرعان جاعدايدا تيجارات – ساۋدا ورتاسىن ساپالىلاندىرۋ ارقىلى كاسىپورىنداردىڭ ومىرشەڭدىك كۇشى مەن جاسامپازدىق قۋاتىن ارتتىرىپ، ەكونوميكانىڭ ورنىقتىلىق بارىسىندا ارتۋىنداي تاماشا جاعدايدى بەكەمدەۋگە، قۇرىلىم دارەجەسىن جوعارىلاتۋدى ىلگەرىلەتۋگە ءتيىمدى.

    ءماجىلىس مىنالاردى ۇيعاردى: ءبىرىنشى توقساندا اقىنى 200 ميلليارد يۋان تومەندەتۋ شاراسىن ورتاعا شىعارۋ نەگىزىندە باجىنى اناعۇرلىم كەمەيتۋدىڭ تومەندەگىدەي شاراسىن ورتاعا شىعارۋ كەرەك: ءبىرىنشى، تيجارات باجىسىن ارتقان قۇن باجىسىنا وزگەرتۋدى باياندى ىلگەرىلەتىپ، ارتقان قۇن باجىسىنىڭ باجى سالىستىرماسى قۇرىلىمىن ىقشامداۋ كەرەك. ۇستەگى جىلى 1 – شىلدەدەن باستاپ ارتقان قۇن باجىسى مەن باجى سالىستىرماسى 4 دارەجە بويىنشا، ياعني ٪17، ٪11 جانە ٪6 كەمەيتىلۋمەن بىرگە، ٪13 تىك باجى سالىستىرماسى دا كۇشىنەن قالدىرىلادى؛ اۋىل شارۋاشىلىق ونىمدەرى، تابيعي گاز سياقتىلاردىڭ ارتقان قۇن باجىسى مەن باجىسى سالىستىرماسى ٪13 تەن ٪11 كە دەيىن كەمەيتىلەدى. سونىمەن بىرگە، اۋىل شارۋاشىلىق ونىمدەرىن مانەرلەيتىن كاسىپورىندار ساتىپ الىنعان اۋىل شارۋاشىلىق ونىمدەرىنىڭ اۋەلگى تارتىپ قالۋ سالماعىن ساقتاۋى وزگەرمەيدى، بۇنداي بولعاندا ساتىپ الىنعان ونىمنەن ۇستاپ قالىپ كەمەيتۋدەن ءارى باجى سالىعىن ارتتىرىپ جىبەرۋدەن ساقتانۋعا بولادى.

    ەكىنشى، كاسىپورىنداردىڭ تابىس باجىسى تيىمدىلىگىنەن يگىلىكتەنەتىن، ءوزى شاعىن، پايداسى ماردىمسىز كاسىپورىندار كوبەيتىلەدى. 2017 – جىلى 1 – قاڭتاردان 2019 – جىلى 31 – جەلتوقسانعا دەيىن ءوزى شاعىن، پايداسى ماردىمسىز كاسىپورىنداردىڭ باجى تاپسىرۋعا ءتيىستى تابىسى 300 مىڭ يۋاننان 500 مىڭ يۋانعا جوعارىلاتىلىپ، وسى شارتقا ۇيلەسەتىن ءوزى شاعىن، پايداسى ماردىمسىز كاسىپورىنداردىڭ تابىسى جارتىلاي ەسەپتەلىپ، ودان ٪20 تىك ولشەم بويىنشا كاسىپورىن تابىس باجىسى الىنادى.

    ءۇشىنشى، عىلىم – تەحنيكالىق ورتا، شاعىن كاسىپورىنداردىڭ زەرتتەۋ – اشۋ قاراجاتى باجىسىنان بۇرىنعى قوسۋ – تارتىپ قالۋ سالىستىرماسى جوعارىلاتىلادى. 2017 – جىلى 1 - قاڭتاردان 2019 – جىلى 31 - جەلتوقسانا دەيىن عىلىم – تەحنيكالىق كاسىپورىنداردىڭ جاڭا تەحنيكا، جاڭا ءونىم، جاڭا تەحنولوگيانى زەرتتەپ – اشۋدا ءىس جۇزىندىك جۇمساعان قاراجاتى كاسىپورىنداردىڭ تابىس باجىسىنان بۇرىنعى قوسۋ – تارتىپ قالۋ سالىستىرماسى بويىنشا ٪50 تەن ٪75 كە جوعارىلاتىلادى.

    ءتورتىنشى، بەيجيڭ – تيانجين – حىبەي ءوڭىرى، شاڭحاي، گۋاڭدۇڭ، انحۇي، سىچۋان، ۋحان، شي – ان، شىنياڭ سىندى جاسامپازدىق رەفورماسىنان جاپپاي تاجىريبە كورسەتۋ رايونى مەن سۋجوۋ ونەركاسىپ باقشا رايونىندا ءتۇيىندى سىناق ورىستەتىلىپ، ۇستەگى جىلى 1 – قاڭتاردان باستاپ كاسىپ اشۋعا قارجى قوسقان كاسىپورىنداردىڭ ا دەپ قارجى قوسۋ مەزگىلىنە قاراتا، العاش كاسىپ اشۋ ساتىسىنداعى عىلىم – تەحنيكالىق كاسىپورىندار قوسقان قارجىسىنا ساي، باجى تاپسىرۋعا ءتيىستى تابىس سوماسىنىڭ ٪70 تىنە باجى تاپسىرۋداي ءتيىمدى ساياساتتان يگىلىكتەنەدى؛ ۇستەگى جىلى 1 – شىلدەدەن باستاپ، وسى ءتيىمدى ساياساتتان يگىلىكتەنەتىن قارجى قوسۋ تۇلعاسىنداعى سەرىكتىك ءتۇزىمى جانە سەرىكتەستىك تۇزىمىندەگى كاسىپ اشۋعا قارجى قوسقان كاسىپورىنداردىڭ زاڭدى سەرىكتەسۋشىسى جەكە ادامدارعا دەيىن كەڭەيتىلەدى. ساياسات كۇشكە يە بولۋدان 2 جىل بۇرىن قوسىلعان قارجى دا جوعارىداعى تيىمدىلىكتەن يگىلىكتەنەدى.

    بەسىنشى، ۇستەگى جىلى 1 – شىلدەدەن باستاپ ساۋدا سيپاتىندىق دەنساۋلىق قامسىزداندىرۋىنان الىناتىن جەكەلەر تابىس باجىسىنان بۇرىنعى تولەۋگە ءتيىستى باجىنى شىعارىپ تاستاۋ سىناق ءتۇيىن ساياساتى بۇكىل ەل كولەمىندە جالپىلاستىرىلىپ، وزدەرى ساتىپ العان، شارتقا ۇيلەسەتىن ساۋدا سيپاتىندىق دەنساۋلىق قامسىزداندىرۋى ونىمدەرى شىعىمىنا قاراتا، جىلىنا ەڭ جوعارى بولعاندا 2 مىڭ 400 يۋاندىق شەك بويىنشا باجى تاپسىرۋدان ىلگەرى شىعارىپ تاستاۋعا رۋحسات ەتىلەدى.

    التىنشى، 2016 – جىلدىڭ سوڭىندا ۋاقىتى تولعان ءىشىنارا باجى تيىمدىلىك ساياساتتارىنىڭ ۋاقىتى 2019 – جىلدىڭ سوڭىنا دەيىن ۇزارتىلادى، بۇل مىنالاردى قامتيدى: زات اينالىمى كاسىپورىندارىنىڭ وزىندە بار كوپ قولدى تاۋارلاردى قامبادا ساقتاۋ قۇرىلعىلارىنا پايدالانعان جەردەن قالا – قالاشىق جەرىنەن پايدالانۋ باجىسى كەمەيتىلىپ جارتىسى الىنادى؛ فينانس قۇرىلىمدارىنىڭ ديحان وتباسىلارىنا بەرىلەتىن شاعىن سومالى قارىز اقشانىڭ ءوسىم كىرىسىنەن الىناتىن ارتقان قۇن باجىسىن كەشىرىم ەتۋىنە قاراتا، وسى ءتيىمدى ساياساتتىڭ قامتۋ كولەمى زاڭدى بەلگىلەمەلەرگە ساي تيجارات جۇرگىزەتىن، شاعىن سومالى قارىز اقشا العان بارلىق كاسىپورىندارعا دەيىن كەڭەيتىلەدى؛ جوعارى مەكتەپ بىتىرگەن ستۋدەنتتەر، كاسىپتەنۋى قيىنعا تۇسكەندەر، قوسىننان شەگىنگەن اسكەرلەر سىندى ءتۇيىندى بۇقارالىق توپتاردىڭ كاسىپ كوزىن اشۋ، كاسىپتەنۋىنە قاراتا، ارتقان قۇن باجىسى، قالالاردى اسىراۋ باجىسى، وقۋ – اعارتۋ قاراجاتى ۇستەمەسى جانە جەكەلەر (كاسىپورىندار) تابىس باجىسى سياقتىلار بەلگىلەمە بويىنشا كەمەيتىلەدى نە قىسقارتىلادى.

جاۋاپتى رەداكتور:سايراش تۇرارجان قىزى