شي جينپيڭ رۋاندانىڭ زۇڭتۇڭى كاگامەمەن كەڭەس وتكىزدى

    شينحۋا اگەنتتىگىنىڭ 17 - ناۋرىزدا بەيجيڭنەن بەرگەن حابارى. مەملەكەت ءتوراعاسى شي جينپيڭ 17 - ناۋرىزدا حالىق سارايىندا رۋاندانىڭ زۇڭتۇڭى كاگامەمەن كەڭەس وتكىزدى. ەكى ەل باسشىلارى جۇڭگو - افريكا سەلبەستىك تالقى مىنبەرىنىڭ يوحاننەسبۋرگتەگى باس قوسۋىنىڭ جەتىستىكتەرىن ىلگەرىلەتۋدى تۇتقا ەتە وتىرىپ، سەلبەستىك ۇلگىسىن بەلسەندى تۇردە جاڭالاپ، ءوزارا ءتيىمدى سەلبەستىكتى جاپپاي تەرەڭدەتىپ، ەكى ەلدىڭ ستراتەگيالىق سەلبەستىگىنىڭ ورەسىن جوعارىلاتۋعا ءبىر اۋىزدان قوسىلدى.

    شي جينپيڭ بىلاي دەپ اتاپ كورسەتتى: جۇڭگو مەن رۋاندا ديپلوماتيالىق قاتىناس ورناتقان 46 جىلدان بەرى، قاشاندا ءبىرىن - ءبىرى ءتۇسىنىپ، ادال نيەتپەن سەلبەسىپ، ەكى ەلدىڭ ساياسي ءوزارا سەنىمى ۇزدىكسىز كۇشەيىپ، ەكونوميكا - ساۋدا جاعىنداعى ءوزارا ءتيىمدى سەلبەستىگى شاپشاڭ دامىپ، گۋمانيتارلىق بارىس - كەلىستەردە كەرەمەت ناتيجەلەر كورىلىپ، ەكى جاقتى قاتىناستا تاماشا دامۋ اۋقىمى جارىققا شىقتى. قازىر جۇڭگو مەن رۋاندانىڭ سەلبەسە دامۋى تاريحي ورايعا ءدوپ كەلدى. ەكى جاق ساياسيداعى ءوزارا سەنىمدى تەرەڭدەتىپ، ءار سالاداعى ادامدار ارا بارىس - كەلىستى كۇشەيتىپ، ەل باسقارۋداعى تاجىريبەلەردى اۋىستىرىپ، حالىقارالىق جانە رايوندىق ىستەردەگى قارىم - قاتىناس پەن سەلبەستىكتى نىعايتۋى كەرەك. جۇڭگو رۋاندا حالقىنىڭ ءوز ەلىنىڭ مەملەكەت جاعدايىنا ۇيلەسەتىن دامۋ جولىن بەلسەنە قاراستىرۋىن قولدايدى. ونەركاسىپتەنۋ مەن اۋىل شارۋاشىلىعىنىڭ وسىزامانداندىرۋ جاعىنداعى سەلبەستىكتى كۇشەيتۋدە جۇڭگو رۋاندانىڭ ەكونوميكالىق ەرەكشە رايون قۇرىلىسىنا قولداۋ كورسەتىپ، رۋاندامەن بىرگە كاسىپتەردىڭ توعىسۋىن كۇشەيتىپ، ءوندىرىس قۋاتى سەلبەستىگىن جەبەپ، رۋاندا جاقتىڭ استىق حاۋىپسىزدىگىن قامتاماسىز ەتۋ قابىلەتىن جوعارىلاتۋدى قالايدى. ەكى جاق نەگىزدىك قۇرىلعى قۇرىلىسى جاعىنداعى سەلبەستىكتى دە كۇشەيتۋى كەرەك، جۇڭگو ءتىپتى كوپ جۇڭگو كاسىپورىندارىن رۋاندانىڭ قاتىناس، ەنەرگيا سياقتى كەلەلى نەگىزدىك قۇرىلعى نىساندارى قۇرىلىسىنا قاتىناسۋعا ىنتالاندىرادى. ساياحات سەلبەستىگىنىڭ كومەسكى كۇشىن اشىپ، ساياحات كاسىبىن ەكى ەلدىڭ ءوزارا ءتيىمدى سەلبەستىگىندەگى جارقىن تۇيىنگە اينالدىرۋ كەرەك. بەيبىتشىلىك، حاۋىپسىزدىك سالاسىنداعى سەلبەستىكتەردى كۇشەيتۋ كەرەك، جۇڭگو رۋاندانىڭ ب م ۇ جانە رايوننىڭ بەيبىتشىلىگىن ساقتاۋ ارەكەتىندە ءتىپتى زور رول ساۋلەلەندىرۋىن قولدايدى.

    شي جينپيڭ مىنالاردى باسا دارىپتەدى: 2013 - جىلى افريكادا ساپاردا بولعان كەزىمدە، جۇڭگو - افريكا قاتىناسىن دامىتۋ ءۇشىن قاشاندا ناعىز ادال ساياسي ۇستانىمدى جانە دۇرىس بورىش، مۇددە كوزقاراسىن باسشىلىققا الۋدى ورتاعا قويعان ەدىم، مۇنىڭ وزەكتى ويى − جۇڭگونىڭ دامۋىن افريكانىڭ دامۋىنا دەم بەرۋمەن تىعىز ۇشتاستىرىپ، سەلبەسىپ بىرگە يگىلىككە كەنەلۋدى، بىرگە دامۋدى جۇزەگە اسىرۋ. جۇڭگو افريكانىڭ دەربەس، باياندى دامۋعا ۇمتىلۋىنداعى ماڭىزدى دەم بەرۋشى جانە ۇلەس قوسۋشى عانا ەمەس، سونداي - اق حالىقارانىڭ افريكاعا باعىتتاعان سەلبەستىكتىڭ جەتەكشىسى. حالىقارالىق جاعدايدا قانداي وزگەرىستەر بولۋىنا قاراماستان، جۇڭگونىڭ افريكاعا ۇستانعان ساياساتى وزگەرمەيدى، جۇڭگو مەن افريكانىڭ دوستىق ءوزارا ءتيىمدى سەلبەستىگىن ىلگەرىلەتۋ اياق الىسى باياۋلامايدى. جۇڭگو افريكاداعى دوس ەلدەرمەن بىرگە جۇڭگو - افريكا سەلبەستىگى تالقى مىنبەرىنىڭ يوحاننەسبۋرگتەگى باس قوسۋىنىڭ جەتىستىكتەرىن جاپپاي تياناقتاندىرىپ، جۇڭگو - افريكا سەلبەستىگىن افريكانىڭ «2063 - جىلعا دەيىنگى كەڭەستىك ءتارتىپتى» جۇزەگە اسىرۋىمەن تىعىز ۇشتاستىرىپ، افريكانىڭ بىرلەسىپ ءوزىن قۇدىرەتتەندىرۋ جانە ونەركاسىپتەنۋ، اۋىل شارۋاشىلىعىن وسىزامانداندىرۋ نىساناسىن جۇزەگە اسىرۋىن قولدايدى.

    كاگامە بىلاي دەدى: رۋاندا جۇڭگومەن بولعان دوستىق قاتىناستى جانە سەلبەستىكتى قاستەرلەيدى، جۇڭگونىڭ رۋاندانىڭ قايتا قۇرۋى مەن دامۋىنا قوسقان باعالى ۇلەستەرىنە العىس ايتادى، جۇڭگو كاسىپورىندارىنىڭ رۋاندانىڭ اۋىل شارۋاشىلىعى، كەن، ساياحات، نەگىزدىك قۇرىلعى قۇرىلىسى سياقتى سالالاردا قارجى قوسۋ سەرپىنىن ارتتىرۋىن قالايدى. رۋاندا جۇڭگونىڭ ۇزاق ۋاقىتتان بەرى اتقارىپ كەلە جاتقان افريكاعا قاراتقان دوستىق ساياساتىن القايدى، جۇڭگونىڭ افريكامەن قاتىناستى دامىتۋدا تەرەزەسى تەڭ بولۋ مەن ءوزارا قۇرمەتتەۋگە تاباندى بولعاندىعىن جانە يدەولوگيا ارقىلى شەكارانى ايىرماعاندىعىن جوعارى باعالايدى، جۇڭگو - افريكا سەلبەستىگى تالقى مىنبەرىنىڭ يوحاننەسبۋرگتەگى باس قوسۋ جەتىستىكتەرى اياسىندا رۋاندا مەن جۇڭگونىڭ، افريكا مەن جۇڭگونىڭ ءار سالاداعى سەلبەستىگىن ىشكەرىلەي ىلگەرىلەتۋىنە بەلسەنە كۇش شىعارادى.

    كەڭەستەن بۇرىن شي جينپيڭ حالىق سارايىنىڭ شىعىس قاقپاسىنىڭ سىرتىنداعى الاڭدا كاگامەنى قارسى الۋ سالتىن وتكىزدى. ءتوراعا شي جينپيڭنىڭ حانىمى پىڭ لييۋان، مەملەكەتتىك حالىق قۇرىلتايى تۇراقتى كوميتەتىنىڭ ورىنباسار مەڭگەرۋشىسى شىن يۋەيۋە، مەملەكەتتىك كەڭەستىڭ مۇشەسى ياڭ جيەچى، مەملەكەتتىك ساياسي كەڭەستىڭ ورىنباسار ءتوراعاسى ۋاڭ چينمين سالتقا قاتىناستى.

جاۋاپتى رەداكتور:سايراش تۇرارجان قىزى