جۇڭگو ازاماتتىق ىستەر زاڭى باس ەرەجەسى ومىرگە كەلدى، «ازاماتتىق ىستەر زاڭناماسى» ءداۋىرى باستالدى

    جۇڭگو ازاماتتىق ىستەر زاڭناماسىنىڭ بەتاشارى سانالاتىن «جۇڭحۋا حالىق رەسپۋبليكاسىنىڭ ازاماتتىق ىستەر زاڭى باس ەرەجەسى» 15 – ناۋرىزدا مەملەكەتتىك 12 – كەزەكتى حالىق قۇرىلتايىنىڭ 5 – ماجىلىسىندە داۋىسقا سالىپ ماقۇلداندى، 2017 – جىلى 1 – قازاننان باستاپ اتقارىلادى. جۇڭگونىڭ ازاماتتىق ىستەر زاڭ – ءتۇزىمى وسىدان باستاپ «ازاماتتىق ىستەر زاڭناماسى» داۋىرىنە قادام تاستادى.

    پارتيانىڭ 18 – قۇرىلتايىنان بەرى پارتيا ورتالىق كوميتەتىنىڭ شەشىم، ورنالاستىرۋلارىنا ساي، مەملەكەتتىك 12 – كەزەكتى حالىق قۇرىلتايى جانە ونىڭ تۇراقتى كوميتەتى ازاماتتىق ىستەر زاڭناماسىن قۇراستىرۋدى جانە ازاماتتىق ىستەر زاڭى باس ەرەجەسىن جاساۋدى زاڭ شىعارۋ قىزمەتىنىڭ ماڭىزدى ءتۇيىنى ەتتى. ازاماتتىق ىستەر زاڭناماسى جالپى پرينسيپتەن جانە تارماق مازمۇندىق بولەكتەردەن قۇرالادى، زاڭ شىعارۋ ورگانى قازىر زات ۇقىعى ءبولىمى، توقتام ءبولىمى، ۇقىققا سۇعاناقتىق جاساۋ جاۋاپكەرلىگى ءبولىمى، وتباسى – نەكە ءبولىمى جانە مۇراگەرلىك ءبولىمى سەكىلدىلەرگە ءبولۋدى ويلاستىرۋدا.

    ازاماتتىق ىستەر زاڭى باس ەرەجەسىندە ازاماتتىق ىستەر زاڭىنىڭ نەگىزگى پرينسيبى، ازاماتتىق ىستەر سۋبيەكتتەرى، ازاماتتىق ىستەر ۇقىعى، ازاماتتىق ىستەر زاڭدىق ارەكەتى، ازاماتتىق ىستەر جاۋاپكەرلىگى جانە ارىز ـ شاعىم بەرۋدىڭ كۇشكە يە ۋاقىتى سياقتى نەگىزگى ازاماتتىق ىستەر زاڭدىق تۇزىمىنە بەلگىلەمە شىعارىلىپ، ەلىمىزدىڭ ازاماتتىق ىستەر زاڭ – ءتۇزىمىنىڭ نەگىزگى جۇلگەسى قالىپتاستىرىلدى، ازاماتتىق ىستەر زاڭناماسىن قۇراستىرۋعا نەگىز قالاندى.ازاماتتىق ىستەر زاڭى باس ەرەجەسىندە ەلىمىزدىڭ تاڭداۋلى ءداستۇرلى مادەنيەت تانىمىنا مۇراگەرلىك ەتىلىپ، سوتسياليستىك وزەكتى قۇن كوزقاراسى ساۋلەلەندىرىلىپ، ازاماتتىق ىستەر سۋبيەكتتەرىنىڭ ازاماتتىق ىستەر قيمىلىمەن شۇعىلدانۋدا تياناق ەتۋگە ءتيىستى ەرىكتى بولۋ پرينسيبى، ادىلدىك پرينسيبى، ادالدىق پرينسيبى سياقتىلار دارىپتەلدى؛ بايلىقتى ۇنەمدەپ، ەكولوگيالىق ورتانى قورعاۋعا پايدالى بولۋعا ءتيىس؛ زاڭعا قايشىلىق جاساۋعا، الەۋمەتتىك ءتارتىپ پەن تاماشا سالتقا قايشىلىق جاساۋعا بولمايدى.

    ازاماتتىق ىستەر زاڭى باس ەرەجەسىندە پارتيا ورتالىق كوميتەتىنىڭ ازاماتتاردىڭ ۇقىعىن قامتاماسىزداندىرۋدى زاڭمەن جونگە سالۋدى جانە مال – مۇلىك ۇقىعىن قورعاۋ ءتۇزىمىن كەمەلدەندىرۋدى ىسكە اسىرۋ جونىندەگى تالابى دايەكتى تياناقتاندىرىلىپ، ازاماتتىق ىستەر ۇقىعىن قورعاۋ كۇشەيتىلىپ، ازاماتتىق ىستەر سۋبيەكتتەرىنىڭ ءتان ۇقىعى، مال – مۇلىك ۇقىعى جانە باسقا زاڭدى ۇقىعى زاڭنىڭ قورعاۋىندا بولاتىنى اناعۇرلىم ايقىندالىپ، ازاماتتىق ىستەر زاڭناماسىنىڭ ءارقايسى بولەگىنىڭ جانە ازاماتتىق – ساۋدالىق ىستەر ارناۋلى زاڭىنىڭ ازاماتتىق ىستەر ۇقىعىن ناقتى بەلگىلەۋى نەگىزبەن قامدالدى.

    ازاماتتىق ىستەر زاڭى باس ەرەجەسى ماقۇلدانعان سوڭ قازىر اتقارىلىپ وتىرعان ازاماتتىق ىستەر زاڭىنىڭ جالپى ەرەجەلەرىندەگى توقتام، مەنشىك ۇقىعى جانە باسقا مال – مۇلىك ۇقىعى، ازاماتتىق ىستەر جاۋاپكەرلىگى سياقتى ناقتى مازمۇندارعا قاراتا ازاماتتىق ىستەر زاڭناماسىنىڭ ءارقايسى بولەگىن قۇراستىرۋ بارىسىندا ىشكەرىلەي تۇتاستاندىرۋ، جۇيەلى بىرىكتىرۋ جۇرگىزىلەدى. ازاماتتىق ىستەر زاڭى باس ەرەجەسى ماقۇلدانعان سوڭ ازاماتتىق ىستەر زاڭىنىڭ جالپى ەرەجەلەرى قازىرشە كۇشىنەن قالدىرىلمايدى، ازاماتتىق ىستەر زاڭى باس ەرەجەسى مەن ازاماتتىق ىستەر زاڭىنىڭ جالپى ەرەجەلەرىندەگى بەلگىلەمەلەردە سايكەسپەۋشىلىك بولسا، جاڭا زاڭ كونە زاڭنىڭ الدىندا تۇرادى دەيتىن پرينسيپ بويىنشا، ازاماتتىق ىستەر زاڭى باس ەرەجەسىنىڭ بەلگىلەمەلەرى قولدانىلادى.ازاماتتىق ىستەر زاڭى باس ەرەجەسىنىڭ داۋىسقا سالىپ ماقۇلدانۋى ازاماتتىق ىستەر زاڭناماسىن قۇراستىرۋ قىزمەتىنىڭ ءبىرىنشى قادامى اياقتالعانىن اڭعارتادى. ەكىنشى قادامدا ازاماتتىق ىستەر زاڭناماسىنىڭ ءارقايسى بولەگى قۇراستىرىلىپ، 2018 – جىلى مەملەكەتتىك حالىق قۇرىلتايى تۇراقتى كوميتەتىنىڭ قاراۋىنا ۇسىنىلادى، مەملەكەتتىك حالىق قۇرىلتايى تۇراقتى كوميتەتى ساتىلار بويىنشا قاراعان سوڭ، 2020 – جىلى ازاماتتىق ىستەر زاڭناماسىن مەملەكەتتىك حالىق قۇرىلتايى ءماجىلىسىنىڭ قاراپ ماقۇلداۋىنان وتكىزۋگە قۇلشىنىس جاسالىپ، ءبىر تۇتاس ازاماتتىق ىستەر زاڭناماسى قالىپتاستىرىلادى.

جاۋاپتى رەداكتور:سايراش تۇرارجان قىزى