رايونىمىزدىڭ اۋىل - قىستاق تاس جول قۇرىلىسىندا جىلدىق مىندەت اسىرا ورىندالدى

    23 مىڭ 204 كيلومەتر تاس جول سالىنىپ بولدى

    ءتىلشىنىڭ اۆتونوميالى رايوندىق قاتىناس - تاسىمال مەڭگەرمەسىنەن ۇعىسۋىنشا، قازىرگە دەيىن رايونىمىزدا 23 مىڭ 204 كيلومەتر اۋىل - قىستاق تاس جولى سالىنىپ بولىپ، بيىلعى قۇرىلىس مىندەتى اسىرا ورىندالىپ، تۇتاس شينجياڭداعى ەگىنشى - مالشىلاردىڭ ءجۇرىس - تۇرىسىنا اناعۇرلىم قولايلىلىق جاراتىلعان.

    قورعاس اۋدانى شىندىقوزى قالاشىعى ىرداۋحىزى قىستاعىنىڭ تۇرعىنى ما ۋىنلي ەسىگىنىڭ الدىنان جاڭادان سالىنعان اسفالت جولدى كورگەندە جۇزىنە كۇلكى ءۇيىرىلدى.

    وسىدان بۇرىن ىرداۋحىزى قىستاعىنىڭ جولى شاعىل جول بولاتىن. بيىل ءساۋىر ايىنىڭ ورتا شەنىندە ىرداۋحىزى قىستاعىنان 8.28 كيلومەتر تاس جول سالۋ قۇرىلىسى باستالدى، ءبىر ايدان استام ۋاقىتتان كەيىن، قىستاقتا تاس جول بۇكىلدەي سالىنىپ بولدى. ما ۋىنلي: ەسىگىمىزدىڭ الدىنان جول سالىندى، سىرتقا شىعۋىمىز وتە قولايلى بولدى، جول جۇرگەندە ەندىگارى قامىقپايتىن بولدىق، - دەدى.

    «12 - بەسجىلدىق» جوبا كەزىندە رايونىمىز اۋىل - قىستاق تاس جولىندا «جولدى ىركىلىسسىزدەندىرىپ حالىقتى اۋقاتتاندىرۋ» قۇرىلىسى مىندەتىن ءۇرتىس 5 جىل اسىرا ورىنداپ، اۋىل - قىستاق تاس جول قۇرىلىسىنا 21 ميلليارد 814 ميلليون يۋان قارجى قوسىپ، جيىنى 38 مىڭ 29 كيلومەتر جولدى جاڭادان سالدى جانە قايتا وزگەرتىپ سالدى. 2016 - جىلى رايونىمىز اۋىل - قىستاق تاس جولىن سالۋ تەبىنىن ۇزبەي كۇشەيتتى، سول جىلى تۇتاس شينجياڭدا اۋىل - قىستاق تاس جول قۇرىلىسىنا جيىنى 6 ميلليارد 500 ميلليون يۋان قارجى قوسىلىپ، 11 مىڭ 9 كيلومەتر تاس جول سالىنىپ، حالىق تۇرمىسىنا تيىمدىلىك جاسايتىن 1600 قىستاق دارەجەلى تاس جول قۇرىلىس ينجەنەرياسى جاپپاي ورىندالىپ، 40 اۋىل - قالاشىق، 300 قۇرىلىمدىق قىستاقتىڭ قاتىناس شارت - جاعدايى جاقسارىپ، ءبىر ميلليون 50 مىڭ ەگىنشى - مالشى بۇقاراسى يگىلىككە كەنەلدى.

    بيىل اۆتونوميالى رايوندىق قاتىناس - تاسىمال مەڭگەرمەسى اۆتونوميالى رايوندىق پارتكوم مەن ۇكىمەت ورنالاستىرعان قاتىناس نەگىزدىك قۇرىلعى قۇرىلىسىنا 200 ميلليارد يۋان قارجى قوسۋ مىندەتى ورايىن مىقتى يگەرىپ، قاتىناس ارقىلى كەدەيلىكتەن قۇتىلدىرۋدان قامال الۋدى كۇش سالا ىلگەرىلەتىپ، اۋىل - قىستاق تاس جولى ارقىلى حالىققا تيىمدىلىك جاساۋ ينجەنەرياسىن اتقارىپ، تۇتاس جىلدا 30 ميلليارد يۋان قارجى قوسىپ، 15 مىڭ كيلومەتر اۋىل - قىستاق تاس جولىن سالۋعا كۇش شىعاردى؛ قالعان 5 اۋىل - قالاشىققا اسفالت جول جاتقىزۋ قۇرىلىسى، 271 قۇرىلىمدىق قىستاققا سەمەنت جول جاتقىزۋ قۇرىلىسى مىندەتىن ورىنداۋ اياق الىسىن جەدەلدەتىپ، اۆتونوميالى رايوننىڭ 2017 - جىلى كەدەيلىك قالپاعى الىنعان اۋداندارداعى (قالا) اۋىل - قىستاق تاس جول قۇرىلىسى مىندەتىن جاپپاي ورىنداپ، جان سانى ءبىرشاما كوپ، بىرىكتىرىلگەن قۇرىلىمدىق قىستاقتاردا سەمەنت جول جاتقىزۋ جانە «ۇعىسۋ، تيىمدىلىك جاساۋ، توعىستىرۋ» قيمىلى بويىنشا حالىق تۇرمىسىنا تيىمدىلىك جاسايتىن قىستاق دارەجەلى تاس جول قۇرىلىسىن جالعاستى جۇرگىزدى؛ اۋدان، اۋىلدارداعى جولداردىڭ دارەجەسىن جوعارىلاتىپ جانە قىستاق كوشەلەرى قۇرىلىسىن جاپپاي اتقارىپ، «تۇيىق جولداردى» اشىپ، رايونىمىزدىڭ اۋىل - قىستاق جول جەلىسى دەڭگەيىن اناعۇرلىم جوعارىلاتتى. تۇتاس شينجياڭدا جوعارىدان تومەنگە دەيىن جاپپاي قۇلشىنۋدىڭ ناتيجەسىندە، كەزەكتە رايونىمىز بيىلعى اۋىل - قىستاق تاس جول قۇرىلىسى مىندەتىن اسىرا ورىندادى.

    سوڭعى مەزگىلدە اۆتونوميالى رايوندىق قاتىناس - تاسىمال مەڭگەرمەسى اۋىل - قىستاق تاس جولىن، تاسىمالىن سايكەستى دامىتۋدى ءبىر تۇتاس جوسپارلاپ، اسفالت (سەمەنت) جولداردى مۇمكىندىكتىڭ بارىنشا ەگىنشىلەردىڭ، مالشىلاردىڭ، شەكارا رايونداعى حالىقتىڭ ەسىگى الدىنا دەيىن جەتكىزۋگە قۇلشىنادى. اۋىل - قىستاق تاس جول قۇرىلىسى ساپاسى جىلى قيمىلىن ۇزدىكسىز ىشكەرىلەي ەتەك الدىرىپ، ساپا تەكسەرۋى مەن ساپا نىساناسىن تەكسەرىپ - باعالاۋ تەبىنىن كۇشەيتىپ، جاۋاپكەرلىگىن قۋزاستىرۋ، ونىمدىلىگىن تەكتەۋدى كۇشەيتىپ، اۋىل - قىستاق تاس جول قۇرىلىسى ساپاسىن ۇزدىكسىز جوعارىلاتىپ، ەگىنشى - مالشىلاردىڭ قولايلى دا ساپالى جولمەن جۇرۋىنە مۇمكىندىك جاسايدى.

جاۋاپتى رەداكتور:سايراش تۇرارجان قىزى