مەملەكەتتىك ەنەرگيا مەكەمەسى «جىبەك جولى ەكونوميكالىق بەلدەۋى وزەكتى رايونىنىڭ (شينجياڭ) ەنەرگيا جوباسىن» بەكىتتى

    ءتىلشىنىڭ اۆتونوميالى رايوندىق دامۋ - رەفورما كوميتەتىنەن ۇعىسۋىنشا، تاياۋدا مەملەكەتتىك ەنەرگيا مەكەمەسى «جىبەك جولى ەكونوميكالىق بەلدەۋى وزەكتى رايونىنىڭ (شينجياڭ) ەنەرگيا جوباسىن» (تومەندە قىسقارتىلىپ «جوبا» دەلىندى ) بەكىتتى. بۇل مەملەكەت بەكىتكەن جىبەك جولى ەكونوميكالىق بەلدەۋىنىڭ ەنەرگيا ىستەرى جونىندەگى تۇڭعىش وڭىرلىك سيپات الاتىن ارناۋلى جوبا بولىپ، جىبەك جولى ەكونوميكالىق بەلدەۋىندەگى ەنەرگيا سەلبەستىگىنىڭ اناعۇرلىم جوعارى دەڭگەيگە قادام تاستاۋىن ىلگەرىلەتۋ جونىنەن توتەنشە ماڭىزدى ءمان الادى.

    مەملەكەتتىك ەنەرگيا مەكەمەسىنىڭ بەكىتۋىندە مىنالار اتاپ كورسەتىلدى: ازيا - ەۆروپا ۇلى قۇرلىعىنىڭ كىندىگىنە ورنالاسقان شينجياڭ جىبەك جولى ەكونوميكالىق بەلدەۋىنىڭ بويىنداعى ەلدەر، ت.ب دۇنيە جۇزىندەگى ەنەرگيا بايلىعى شوعىرلانعان وڭىرلەردى تۇتاستىرادى، ەلىمىزدىڭ باتىسقا ەسىك اشۋىنداعى ماڭىزدى قاقپاسى جانە مەملەكەتتىڭ ماڭىزدى ەنەرگيا ستراتەگيالىق بازاسى. شينجياڭنىڭ ەنەرگيا قۇرىلىسىندا جانە شەتەلدەرمەن سەلبەستىك ورناتۋدا «ءبىر بەلدەۋ، ءبىر جول» قۇرىلىسى ورايىن يگەرىپ، ەنەرگيا بايلىعىنا قاتىستى ءوندىرىس قۋاتى، تەحنيكالىق جابدىق جانە ساۋدا سەلبەستىگى ىستەستىگىن تەرەڭدەتىپ، ەنەرگيا نەگىزدىك قۇرىلعى قۇرىلىسى مەن بايلانىس جاساۋ، حابارلاسۋ ىستەرىن كۇشەيتۋ كەرەك.

    «جوبادا» مىنالار اتاپ كورسەتىلدى: شينجياڭنىڭ ەنەرگيا اشۋداعى تەبىندەپ كەلە جاتقان باسىمدىعىنان تولىق پايدالانىپ، ەل ءىشى - سىرتىنداعى وزىق ەنەرگيا جابدىقتاۋ جانە جاساۋ كاسىپتەرىنىڭ شينجياڭعا ىرگە تەبۋىنە بەلسەنە جەتەكشىلىك ەتىپ، شينجياڭدى باتىس سولتۇستىك وڭىرگە قىزمەت كورسەتەتىن، ورتا ازياعا باعىتتالعان، وڭىرلىك سيپات العان ەنەرگيا جابدىقتارىن جاساۋ كاسىپ سالاسى بازاسى ەتىپ قۇرىپ شىعۋعا قۇلشىنۋ؛ شينجياڭنىڭ وڭىرلىك باسىمدىعىن تولىق ساۋلەلەندىرىپ، توڭىرەكتەگى ەلدەرمەن جانە جىبەك جولى ەكونوميكالىق بەلدەۋىنىڭ بويىنداعى ەلدەرمەن ەنەرگيا نەگىزدىك قۇرىلعىلارىن تۇتاستىرۋ، جالعاۋ ىستەرىن جەدەل دامىتىپ، ەلىمىزدىڭ ەنەرگيا حاۋىپسىزدىگىن قامتاماسىز ەتۋ ورەسى مەن بايلىقتى ساپالى ورنالاستىرۋ قابىلەتىن جوعارىلاتۋ كەرەك.

    شينجياڭ ورتا ازيامەن، رەسەيمەن، موڭعۇليامەن، پاكيستانمەن مۇناي - گاز، كومىر جانە تۋىندامالى ەنەرگيا بايلىعىنا قاتىستى سەلبەستىكتەردى شىن مانىندە ويداعىداي ىلگەرىلەتىپ، جىبەك جولى ەكونوميكالىق بەلدەۋىنىڭ بويىنداعى ەلدەرمەن ساۋدا سەلبەستىگىنىڭ تەبىنىن ارتتىرىپ، ءبىر تۇلعالانعان ەنەرگيا كاسىپ تىزبەگى سەلبەستىگىن بەلسەندى ىلگەرىلەتۋ كەرەك. ەنەرگيا بايلىعى، ەنەرگيا جابدىعى جاعىنداعى سەلبەستىك ورايىن مىقتى يگەرىپ، ادام، تەحنيكا، ينفورماتسيا، ينجەنەريالىق قىزمەت كورسەتۋ، ەنەرگيا ورتاسى جونىندەگى سەلبەستىكتى كۇشەيتىپ، ەنەرگيا سەلبەستىگىنىڭ جاڭا بەتالىسى تۋرالى بەلسەندى ىزدەنىس جاساۋ كەرەك. سونىمەن بىرگە، شينجياڭ ەنەرگيانى اشۋ بارىسىندا اشۋدىڭ، پايدالانۋدىڭ كوپ نەگىزدى، ورنىقتى، ءونىمدى، تازا جۇيەسىن بىرتىندەپ ورناتۋ كەرەك.

جاۋاپتى رەداكتور:سايراش تۇرارجان قىزى