شينجياڭدىق قاريانىڭ شي - اندا ەمدەلۋ بارىسى

    ايجامال

    «ۋاي، ءماتنياز اتاي سالەمەتسىز بە! تاۋىرلەنىپ قالدىڭىز با؟» شي - ان تەحنولوگيا ۋنيۆەرسيتەتى سۋ يگىلىگى - سۋ ەلەكتر ينستيتۋتى سۋ يگىلىگى - سۋ ەلەكتر ينجەنەرياسى 153 - كلاسىنداعى ءمارىپجان تۇرسىن 10 - شىلدەدە قاراقاش اۋدانى اقساراي اۋىلىنىڭ باس شتاچى قىستاعىنداعى ۇيعۇر اقساقال ءماتنياز موللاعا تەلەفون جالعاپ، دەنساۋلىق جاعدايىن ۇعىستى.

    بيىل 73 جاسقا شىققان ءماتنياز اقساقال 16 - مامىردا تىنىس جولى اياق استىنان قابىنىپ، تاماعىنان اس وتپەي قالادى، سونىمەن اقساقالدى ۇلى توقتىمامەت ءماتنياز شي - انعا داۋالاتقالى الىپ بارادى. حانزۋ تىلىنەن حابارى جوق اكەلى - بالالى ەكەۋى اۋرۋ جاعدايىن تەكسەرتۋ بارىسىندا كوپتەگەن اۋرەشىلىككە ۇشىرايدى. شي - ان تەحنولوگيا ۋنيۆەرسيتەتى اماندىقتى قورعاۋ باسقارماسى ساياسي اماندىق ىشكى ىستەر ءبولىمىنىڭ ورىنباسار باستىعى شيڭ شياڭياڭ مەن وسى ۋنيۆەرسيتەتتە وقيتىن شينجياڭدىق ۇيعۇر وقۋشىلار ولارعا كومەك قولدارىن سوزىپ، شيجيڭ اس قورىتۋ اۋرۋلارى شيپاحاناسىنا اپارىپ ورنالاستىرادى.

    «اكەم ەكەۋىمىزدى ءبىر وقىتۋشى ەرتىپ ءجۇرىپ ارناۋلى تەكسەرتتى، ءتىپتى ەڭبەكاقى كارتچكاسىنا دەيىن الىپ شىعىپ، قارجىلاي كومەك كورسەتتى. ال ستۋدەنتتەر اكەمە تاۋلىك بويى كەزەكپەن قارايلاسىپ تۇردى، كۇنى بۇگىنگە دەيىن تەلەفون سوعىپ، حال - جايىن ۇعىسىپ تۇرادى، ولارعا ءدان ريزامىن!»، - دەپ العىسىن جاۋدىردى توقتىمامەت شي - انداعى كۇندەرىن ەسكە الىپ.

    شي - انعا بارا قالعاندا، اكەلى - بالالى ەكەۋى حانزۋ ءتىلىن تۇسىنبەيتىندىكتەرىنەن شيپاگەرمەن تىلدەسە الماي قاتتى قينالادى، ءدال وسىنداي تورىققان ساتتەرىندە، ولار شيڭ شياڭياڭ ۇستاز بەن ستۋدەنت ءمارىپجان تۇرسىندى جولىقتىرادى. شيڭ شياڭياڭ ولاردىڭ شي - انعا نە سەبەپپەن كەلگەندىگىن ۇيعۇر تىلىندە سۇراپ ۇعىسقاننان كەيىن، دەرەۋ 4 - اسكەري مەديتسينا ۋنيۆەرسيتەتىنە قاراستى شيجيڭ شيپاحاناسىنا ەرتىپ بارىپ، ولاردىڭ شيپاحاناعا جاتىپ تەكسەرىلىپ داۋالانۋىنا كومەك كورسەتەدى. قاشقار پەداگوگيكا ينستيتۋتىنان ۇيعۇر ءتىلى كاسىبىن وقىعان شيڭ شياڭياڭنىڭ اۋىلى سانجىدا، ۇيعۇرشا - حانزۋشا اۋدارۋعا ابدەن جەتىلگەن ول مەكتەپ بىتىرگەننەن كەيىن وقىتۋشىلىقپەن شۇعىلدانعان، 2016 - جىلى جەلتوقساندا شي - ان تەحنولوگيا ۋنيۆەرسيتەتىنە اۋىسىپ كەلىپ، شينجياڭنان كەلگەن از ۇلت وقۋشىلارىنا قىزمەت كورسەتۋ، باسقارۋ قىزمەتىنە جاۋاپتى بولعان. اقساقال شيپاحانادا تولىق 8 كۇن جاتادى. وسى بارىستا شيڭ شياڭياڭ ولارعا باستان - اياق كومەكتەسىپ كەلدى، اقساقالعا وپەراتسيا جاساعان كۇنى شينجياڭنان كەلگەن 17 ۇلتتىق وقۋشىنى ەرىكتى قىزمەت وتەۋگە ۇيىستىرىپ، اقساقالدى تاۋلىك بويى كەزەكتەسىپ قاراۋعا جاۋاپتاندىرادى.

    اقساقالعا كومەكتەسكەن 10 نەشە كۇن ءبىز ءۇشىن وڭاي بولماعانىمەن، ءبىراق اقساقالدىڭ كۇننەن - كۇنگە تاۋىرلەنىپ كەلە جاتقاندىعىن كورىپ، ەڭبەگىمىز وتەلدى دەپ قاتتى قۋاندىق، - دەدى ءمارىپجان تۇرسىن.

    ءمارىپجان ماناس اۋدانى لانجوۋۋان قالاشىعى ارداۋشۋۋوزى قىستاعىنان كەلگەن، اكە - شەشەسى بىردەي ديقان، اكەسى 2013 - جىلى قايتىس بولعان. ول قاجىرلىلىقپەن ۇيرەنۋدىڭ ارقاسىندا ىشكى ولكەلەردەگى شينجياڭ كلاسىنداعى 4 جىلدىق ۇيرەنۋىن ءبىر جىل بۇرىن تامامداپ، 2015 - جىلى شي - ان تەحنولوگيا ۋنيۆەرسيتەتىنىڭ سۋ يگىلىگى سۋ ەلەكتر ينجەنەرياسى كاسىبىنە وقۋعا تۇسەدى. «مەن ءماتنياز اتاي سياقتى كومەككە مۇقتاج جاندار ءۇشىن ەرىكتى قىزمەت وتەۋدى ۇزدىكسىز جالعاستىرامىن»، - دەدى ءمارىپجان شىن پەيىلمەن.

    22 - ماۋسىمدا شانشي ولكەلىك پارتكومنىڭ جوعارى دارەجەلى وقىتۋ قىزمەت كوميتەتى شيڭ شياڭياڭ باستاعان وقىتۋشى - وقۋشىلار كوللەكتيۆىنە «شانشي ولكەسىندەگى وزگەلەرگە كومەكتەسۋدى قۋانىش ساناعان وزات كوللەكتيۆ» داڭقتى اتاعىن بەردى، سونداي - اق شيڭ شياڭياڭ ۇستازدى 10 مىڭ يۋان اقشامەن سيلايدى. شيڭ شياڭياڭ 10 مىڭ يۋاندى قولما - قول مەكتەپتەگى شينجياڭدىق از ۇلت وقۋشىلاردىڭ تۇرمىس، ۇيرەنۋ بارىسىندا ءدوپ كەلگەن قيىنشىلىقتارىن شەشۋگە اتادى.

جاۋاپتى رەداكتور:سايراش تۇرارجان قىزى