ءار ۇلت بۇقاراسىنا ۇلى وتان شاڭىراعىنىڭ جىلۋىن سەزىندىردى

    جاڭا كەزەكتى شينجياڭعا باعىتتامالى كومەك بەرۋ قىزمەتى جونىندە (1)

    حان چينيان

    2010 - جىلى جاڭا كەزەكتى شينجياڭعا باعىتتامالى كومەك بەرۋ قىزمەتى ورىستەتىلگەننەن بەرى، 19 ولكە، قالادان شينجياڭعا كومەككە كەلگەن كادرلار مەملەكەت جۇكتەگەن بورىشتى ۇستىلەرىنە الىپ، قالتقىسىز ۇلى سۇيىسپەنشىلىكپەن جۇكتەرىن ارقالاپ، باتىسقا جول تارتىپ، تيانشاننىڭ تۇستىگى مەن تەرىستىگىندەگى بايتاق دالاعا قادام تاستاپ، شەكارا وڭىردە ايبىندى ءارى اسەم، جاڭا جىر جازدى.

    سوڭعى 7 جىلدان بەرى، شينجياڭعا باعىتتامالى كومەكتەسەتىن 19 ولكە، قالا حالىق تۇرمىسىن جاقسارتۋدى جانە قامتاماسىز ەتۋدى ماڭداي الدى ورىنعا قويىپ، شينجياڭعا كومەك قارجىلارىن حالىق تۇرمىسىنا قاراي بەيىمدەۋگە، نەگىزگى ساتىعا قاراي بەيىمدەۋگە تاباندى بولىپ، ايتارلىقتاي ناتيجەگە قول جەتكىزدى. ءبىز جاڭا قونىسقا كوشكەن ەگىنشى - مالشىلاردىڭ جاڭا ءومىر باستاعانىنا، بالالاردىڭ جارىق تا كەڭ ساباقحانالاردا ساباق وقىعانىنا، اۋىل ەمحانالارى مەن قىستاق ەمحانالارىنىڭ دياگنوز قوياتىن، ەمدەيتىن وزىق اسپاپتارمەن جابدىقتالعانىنا، كەيبىر كۇردەلى اۋرۋلارعا شالدىققان تۇرعىنداردىڭ قىستاقتىڭ وزىندە ەمدەلىپ جازىلاتىنىنا قۋانىشپەن كۋا بولدىق.

    تيانشاننىڭ تۇستىگى مەن تەرىستىگىندەگى جاڭا بەينە

    حىجيڭ اۋدانى حىبەي جاڭا قىستاعىنا بارعانىمىزدا، قىستاق بەينەسىنىڭ كوركەم سۋرەتى − جاڭا ۇلگىدە جوبالانعان 2 قاباتتى «ساياجايلار»، ورنىمەن جوبالانعان كورىنىستىك جاياۋ جولدار، رەتتى اسفالت كوشەلەر − كوزىمىزگە وتتاي باسىلدى.

    «ءبىز مالشىلار دا وسىنداي كەرەمەت ۇيدە تۇرامىز دەگەن كىمنىڭ تۇسىنە كىرگەن»، - دەيدى كۇن سايىن تۇرلەنگەن قىستاقتىڭ جاڭا بەينەسىن كورگەن بايىنبۇلاق ساحاراسىنىڭ مالشىسى بارنەي كوڭىلدەنە: «قابات ۇيدە تۇرىپ، قۇبىر سۋىن ءىشىپ، ىستىق سۋعا قۇيىنامىز، راقات دەگەن وسى ەمەس پە!»

    «اۋىز سۋى، سۋ ىعىستىرۋ جۇيەسى، وتىندىق گاز، جىلۋمەن قامداۋ، جارىق، حابارلاسۋ سياقتى كەرەكتى قۇرىلعىلاردىڭ بارلىعى بار. مۇنداي جاقسى ءومىر پارتيانىڭ قامقورلىعىنان، حىبەي ولكەسىنىڭ قالتقىسىز كومەگىنەن ايرىلا المايدى»، - دەيدى شاعىن اۋماقتا سەرۋەندەپ جۇرگەن پاڭ في تەبىرەنە.

    حىبەي جاڭا قىستاعىنىڭ وزگەرىسى 19 ولكە، قالانىڭ شينجياڭعا باعىتتامالى كومەك بەرۋ قىزمەتىنىڭ حالىق تۇرمىسىن الدىمەن ويلاستىرۋ، حالىق تۇرمىسىن جاقسارتۋدى الدىمەن باستاۋ ۇستانىمىنىڭ ناقتى بەينەسى.

    ياركەن، پوسكام، قاعىلىق، مارالباسى سياقتى قاشقار ايماعىنداعى 4 اۋدانعا باعىتتامالى كومەك بەرەتىن شاڭحاي قالاسى 2014 - جىلدان 2016 - جىلعا دەيىنگى 3 جىلدىڭ وزىندە ارنايى جاردەم قارجىسىنان 2 ميلليارد 299 ميلليون يۋان سالىپ، كومەك قابىلدايتىن جەرلەردەگى 200 مىڭ 80 وتباسىنىڭ بەيقۇت ءۇي سالۋىنا قولداۋ كورسەتىپ، ميلليونعا جۋىق ەگىنشى - مالشى جاڭا قونىسقا كوشكەن. جاڭا ۇيگە ەگىنشى - مالشىلاردىڭ الاڭسىز كوشىپ كىرۋى ءۇشىن، شاڭحاي قالاسى توتە جاردەماقى بەرۋدەن سىرت، تاعى ءبىر ميلليارد 103 ميلليون يۋان قارجىنى وتىرىقتانۋ تۇيىنىندەگى نەگىزدىك قۇرىلعىلار قۇرىلىسىنا جۇمساعان.

    گۇما اۋدانى سەيدۇللا قالاشىعىندا 102 وتباسى، 338 قىرعىز مالشى بار. انحۇي ولكەسى كومەك بەرىپ سالعان سەيدۇللا قالاشىق ۇكىمەتىنىڭ 3 قاباتتى قىزىل عيماراتى قارلى تاۋمەن ايشىقتالىپ تۇر، اناداي جەردەن مالشىلاردى وتىرىقتاندىرۋ ءۇشىن جاڭادان سالىنعان شاعىن اۋماق كوز تارتادى. انحۇي ولكەسى شينجياڭعا باعىتتامالى كومەكتەسۋ قارجىسىنان 11 ميلليون 700 مىڭ يۋان شىعارىپ، گۇما اۋدانىنداعى كۇنلۇن تاۋىندا مالشىلاردى وتىرىقتاندىرىپ، مال شارۋاشىلىعىن گۇلدەندىرۋ بەيقۇت ءۇيى قۇرىلىسىن سالۋعا كومەكتەستى، سونداي - اق كۇن ەنەرگياسىمەن ەلەكتر شىعارۋ قۇرىلعىلارىن تارتۋ ەتتى. سوڭعى 3 جىلدان بەرى، انحۇي ولكەسى ءار وتباسىعا 10 مىڭ يۋان جاردەماقى بەرۋ ولشەمى بويىنشا، گۇما اۋدانىنداعى 30 مىڭ 500 ەگىنشى - مالشى وتباسىنىڭ بەيقۇت ءۇي سالۋىنا كومەكتەستى، سونىمەن بىرگە، نەگىزدىك قۇرىلعى قۇرىلىسىنا جاردەم بەردى. 2015 - جىلى 3 - شىلدەدە گۇمادا جەر سىلكىنگەندە، وسى بەيقۇت ۇيلەر بۇقارانىڭ «جانىن الىپ قالدى».

    ساناققا نەگىزدەلسەك، 2014 - جىلدان 2016 - جىلعا دەيىنگى 3 جىلدا شينجياڭعا كومەكتەسەتىن ولكە، قالالار شينجياڭعا كومەك قارجىسىنان 36 ميلليارد 490 ميلليون يۋان قارجى سالىپ، حالىق تۇرمىسىنا قاتىستى 2971 نىسان اتقارعان، 758 مىڭ بەيقۇت ءۇيدى جاڭادان سالعان نەمەسە وزگەرتىپ سالعان، 3 ميلليوننان استام ەگىنشى - مالشى جارىق تا كەڭ جاڭا ۇيلەرگە كوشكەن.

    «2 جاتىن بولمەلى ۇيدە» تۇرىپ، اسفالت جولمەن ءجۇرىپ، قۇبىر سۋىن ءىشتى... جاڭا كەزەكتى شينجياڭعا باعىتتامالى كومەكتەسۋ قىزمەتى ورىستەتىلگەننەن بەرى، كومەك قابىلداعان جەرلەردەگى كوپتەگەن بۇقارانىڭ كوكەي تەستى ماسەلەلەرى شەشىلدى، بۇل وراسان زور وزگەرىستەر تيانشاننىڭ تۇستىگى مەن تەرىستىگىندەگى تاماشا كورىنىسكە اينالدى.

جاۋاپتى رەداكتور:سايراش تۇرارجان قىزى