چىن چۋانگو، شوكىرات زاكىر شاڭحاي سەلبەستىك ۇيىمىنا مۇشە ەلدەردىڭ شەكارا قورعانىس تاراۋلارىنىڭ ۋاكىلدەر ۇيىرمەلەرىمەن كەزدەستى

    26 - ماۋسىم تۇستەن كەيىن اۆتونوميالى رايوندىق پارتكومنىڭ شۋجيى، شينجياڭ اسكەري رايونى پارتكومىنىڭ ءبىرىنشى شۋجيى چىن چۋانگو، اۆتونوميالى رايوندىق پارتكومنىڭ ورىنباسار شۋجيى، اۆتونوميالى رايوننىڭ ءتوراعاسى شوكىرات زاكىر ۇرىمجىدە «تيانشان − 3 (2017)» شاڭحاي سەلبەستىك ۇيىمىنا مۇشە ەلدەردىڭ جاۋاپتى ورگانىنا قاراستى جۇڭگو - قىرعىزستان شەكارا قورعانىس تاراۋلارىنىڭ لاڭكەستىككە قارسى تۇرۋ بىرىككەن مانەۆرىنە قاتىناسقان شاڭحاي سەلبەستىك ۇيىمىنا مۇشە ەلدەردىڭ شەكارا قورعانىس تاراۋلارىنىڭ ۋاكىلدەر ۇيىرمەلەرىنىڭ باستىقتارىمەن كەزدەستى.

    قوعام حاۋىپسىزدىگى مينيسترىنىڭ كومەكشىسى ۋاڭ جيان، قوعام حاۋىپسىزدىگى مينيسترلىگى شەكارا قورعانىسىن باسقارۋ مەكەمەسىنىڭ باستىعى چىن ديڭۋ، اۆتونوميالى رايوننىڭ باسشىلارىنان لي شۋەجۇن، جاۋ چيڭدار كەزدەسۋدە بىرگە بولدى.

    چىن چۋانگو اۆتونوميالى رايوندىق پارتكوم، ۇكىمەت اتىنان شاڭحاي سەلبەستىك ۇيىمىنا مۇشە ەلدەردىڭ شەكارا قورعانىس تاراۋلارىنىڭ ۋاكىلدەر ۇيىرمەلەرىنىڭ «تيانشان −3 (2017)» شاڭحاي سەلبەستىك ۇيىمىنا مۇشە ەلدەردىڭ جاۋاپتى ورگانىنا قاراستى جۇڭگو - قىرعىزستان شەكارا قورعانىس تاراۋلارىنىڭ لاڭكەستىككە قارسى تۇرۋ بىرىككەن مانەۆرىنە قاتىناسقانىن قارسى الاتىنىن ءبىلدىردى. چىن چۋانگو بىلاي دەدى: شاڭحاي سەلبەستىك ۇيىمى قۇرىلعان 16 جىلدان بەرى، مۇشە ەلدەردىڭ ءوزارا سەنىمدىلىكتى كۇشەيتىپ، تاتۋ دوستىقتى تەرەڭدەتىپ، سىندارلى سەلبەستىكتى كەڭەيتىپ، ءوڭىردىڭ حاۋىپسىزدىگى مەن ورنىقتىلىعىن بىرگە قورعاۋدىڭ ماڭىزدى تۇعىرىنا جانە سەنىمدى سۇيەنىشىنە اينالدى. جۋىقتا ءتوراعا شي جينپيڭ شاڭحاي سەلبەستىك ۇيىمىنا مۇشە ەلدەر باسشىلارى القالار كەڭەسىنىڭ 17 - رەتكى ماجىلىسىنە قاتىناسقان كەزدە مىنالاردى اتاپ كورسەتتى: «ءۇش ءتۇرلى كۇشكە» سوققى بەرۋ كۇرەسىنىڭ مىندەتى ءالى اۋىر، جولى ۇزاق، ءبىز بۇرىنعىداي ءوڭىردىڭ حاۋىپسىزدىگى مەن ورنىقتىلىعىن قورعاۋدى شاڭحاي سەلبەستىك ۇيىمىنىڭ جۇمىستارىنىڭ باسىم باعىتى ەتۋدەن جازباۋىمىز كەرەك. «تيانشان − 3 (2017)» شاڭحاي سەلبەستىك ۇيىمىنا مۇشە ەلدەردىڭ جاۋاپتى ورگانىنا قاراستى جۇڭگو - قىرعىزستان شەكارا قورعانىس تاراۋلارىنىڭ لاڭكەستىككە قارسى تۇرۋ بىرىككەن مانەۆرىن وتكىزۋ − شاڭحاي سەلبەستىك ۇيىمىنا مۇشە ەلدەر باسشىلارىنىڭ استاناداعى باس قوسۋىنىڭ جانە شاڭحاي سەلبەستىك ۇيىمىنىڭ وڭىرلىك لاڭكەستىكپەن كۇرەس قۇرىلىمى كەڭەسىنىڭ 30 - رەتكى جيىنىنىڭ قاۋلىسىن ىسكە اسىرعاندىق، بۇل شاڭحاي سەلبەستىك ۇيىمىنا مۇشە ەلدەردىڭ قورعانىس ىستەرى مەن حاۋىپسىزدىك سالاسىنداعى سەلبەستىكتەرىن ونان ارى جەبەپ، وڭىردەگى لاڭكەستىك قاتەرگە بىرگە توتەپ بەرۋدە، «ءۇش ءتۇرلى كۇشكە» تىزە قوسا سوققى بەرىپ، شاڭحاي سەلبەستىك ۇيىمىنا مۇشە ەلدەر اۋماعىنداعى حاۋىپسىزدىك پەن ورنىقتىلىقتى جەبەۋدە ايرىقشا كەلەلى مانگە يە. مانەۆرگە قاتىناسقان كۇشتەردىڭ تىعىز سەلبەسىپ، لاڭكەستىككە بىرىگىپ قارسى تۇرىپ، سايكەسىپ شايقاس جۇرگىزۋدىڭ ناقتى سوعىس قابىلەتى مەن شەكارا قورعانىسىندا زاڭ اتقارۋ سەلبەستىگىنىڭ جوعارى دەڭگەيىن تولىق كورسەتۋلەرىن ءۇمىت ەتەمىن.

    شاڭحاي سەلبەستىك ۇيىمى وڭىرلىك لاڭكەستىكپەن كۇرەس قۇرىلىمى اتقارۋشى كوميتەتىنىڭ مەڭگەرۋشىسى، گەنەرال - پولكوۆنيك سيسوەۆ ەۆگەني سەرگەيەۆيچ جۇڭگو ۇكىمەتىنىڭ لاڭكەستىكپەن كۇرەستىڭ مەملەكەتتىك سەلبەستىگىن كۇشەيتىپ، ءوڭىردىڭ حاۋىپسىزدىگى مەن ورنىقتىلىعىن قورعاۋ ءۇشىن قوسقان بەلسەندى ۇلەسىنە جوعارى باعا بەردى. سيسوەۆ بىلاي دەدى: ءبىز جۇڭگو شاڭحاي سەلبەستىك ۇيىمىنىڭ كەزەكتى ءتوراعا ەلى بولعاننان كەيىن، شاڭحاي سەلبەستىك ۇيىمىنىڭ ءتۇرلى سالاداعى سەلبەستىگى ءتىپتى دە مول جەمىس بەرەدى دە كۇتەمىز. بۇل رەتكى بىرىككەن مانەۆر شاڭحاي سەلبەستىك ۇيىمىنا مۇشە ەلدەر باسشىلارىنىڭ استاناداعى باس قوسۋىنان كەيىنگى، شاڭحاي سەلبەستىك ۇيىمى اياسىنداعى حالىقارالىق سەلبەستىكتىڭ ەڭ جارقىن مىسالى. لاڭكەستىككە قارسى بىرىككەن مانەۆر ارقىلى، بۇكىل دۇنيەگە ءبىزدىڭ «ءۇش ءتۇرلى كۇشكە» سوققى بەرۋدەگى وسكەلەڭ ءبىر اۋىزدى تۇرعىمىز بەن بەكىمىمىزدى كورسەتەمىز.

جاۋاپتى رەداكتور:نۇرجان مينۋار قىزى