اتادان نەمەرەگە دەيىنگى ءۇش بۋىننىڭ پارتياعا، وتانعا دەگەن شىنايى سۇيىسپەنشىلىگى

    حوتان اۋدانىندا تۇراتىن وتانشىل ءدىني قايراتكەر ابدۇجەلىلدىڭ ءۇيىنىڭ اۋلاسىنداعى كورمە بولمەسىندە ءتوراعا ماۋ زىدۇڭنىڭ كوپتەگەن سۋرەتتەرى مەن زناكتارى قويىلعان. بۇل − اتادان نەمەرەگە دەيىنگى ءۇش بۋىن ادامداردىڭ 60 جىلعا تاياۋ ۋاقىت جيناعان «اتا مۇراسى» −

    رەداكتوردان: حوتان اۋدانىندا مىناداي ءبىر وتباسى بار: اتاسىنان نەمەرەسىنە دەيىنگى ءۇش بۋىن ءتوراعا ماۋ زىدۇڭنىڭ ءار داۋىردەگى سۋرەتتەرى مەن زناكتارىن ىزدەۋ مەن ساقتاۋدى باتىل جالعاستىرىپ، ەڭ شىنايى وتانشىلدىق سۇيىسپەنشىلىكتەرىن ەڭ قاراپايىم تاسىلمەن بەينەلەگەن. تاياۋدا اۆتونوميالى رايوندىق پارتكومنىڭ بىرلىكساپ ءبولىمى رايونىمىزداعى نەگىزگى اقپارات قۇرالدارىن ۇيىمداستىرىپ حوتان اۋدانىنا بارىپ، وسى اسەرلى ءىس تۋرالى تىلشىلىك جاساپ قايتتى. گازەتىمىزدىڭ بۇگىنگى سانىندا وقىرماندارعا وسى حاباردى بەرىپ وتىرمىز.

    ميھىرگۇل

    2016 - جىلى 25 - جەلتوقساندا حوتان اۋدانىندا تۇراتىن وتانشىل ءدىني قايراتكەر ابدۇجەلىل اتوۋاللا كۇندەگىدەي ءۇيدىڭ ۇساق - تۇيەك شارۋالارىن ىڭعايلاعان سوڭ، اۋلاداعى كورمە بولمەسىنە كەلىپ، رامكالاردى، سورەلەردى تاپتەشتەي ءسۇرتىپ شىقتى. بۇل جەرگە قويىلعان ءتوراعا ماۋ زىدۇڭنىڭ سۋرەتتەرى مەن زناكتارى اتاسىنان نەمەرەسىنە دەيىنگى ءۇش بۋىن ادامنىڭ جيناعان اسىلدارى. ول ءار كۇنى كورىپ قايتپاسا كوڭىلى كونشىمەيدى. «بۇل سۋرەتتەر مەن زناكتار اتامنان اكەمە، اكەمنەن ماعان جالعاسقان، بۇل زناكتار مەن سۋرەتتەردىڭ استارىندا كوپ اڭگىمەلەر بار، ولار جۇڭگونىڭ دامۋ تاريحىنىڭ كۋاسى. وتاننىڭ ۇلى شاڭىراعىندا جاساپ جاتقان ءار ۇلت حالقى بۇگىندە باقىتتى دا جارقىن ءومىر كەشۋدە، بۇعان وڭاي قول جەتكەن جوق، قازىرگى باقىتتى ءومىردىڭ ماشاقاتتى ەڭبەكتىڭ بوداۋىنا كەلگەنىن ۇمىتپاۋىمىز كەرەك»، - دەيدى ابدۇجەلىل ەرەكشە تەرەڭ اسەرمەن.

    اتادان نەمەرەگە جالعاسقان «اتا مۇرا»

    ابدۇجەلىلدىڭ اتاسى سىدىق ءماشىراپ جاڭا جۇڭگو قۇرىلعاندىعىنىڭ كۋاگەرى. جاڭا جۇڭگو قۇرىلعان سوڭ، سىدىق ءماشىراپ ەڭسە كوتەرىپ ازاتتىققا شىعىپ، مەملەكەتتىڭ شىنايى قوجاسىنا اينالدى. ونىڭ نازارىندا، ءتوراعا ماۋ زىدۇڭ جۇڭگو كوممۋنيستىك پارتياسىن باستاپ بۇكىل جۇڭگونى ازات ەتتى، وسىدان باستاپ ءار ۇلت حالقى باقىتتى ومىرگە قادام تاستادى. ول ءتوراعا ماۋ زىدۇڭعا، پارتياعا جۇرەك تۇكپىرىنەن العىس ايتتى.

    الدىڭعى عاسىردىڭ 60 - جىلدارىنان باستاپ سىدىق ءماشىراپ ءار الۋان تاسىلدەرمەن ءتوراعا ماۋ زىدۇڭنىڭ سۋرەتتەرىن جينادى، تالاي جىل قۇلشىنۋ ارقىلى ءتوراعا ماۋ زىدۇڭنىڭ 500دەن استام سۋرەتىن، ءبىراز زناكتارىن جينادى. 80 - جىلدارعا كەلگەندە، ول ءوزى قاستەرلەپ ساقتاعان ءتوراعا ماۋ زىدۇڭنىڭ سۋرەتتەرىن «اتا مۇرا» رەتىندە ۇلى اتوۋاللا سىدىققا تابىستادى ءارى وعان ءتوراعا ماۋ زىدۇڭنىڭ ءتىپتى كوپ سۋرەتتەرىن ىزدەۋدى جانە قاستەرلەپ ساقتاۋدى تاپسىردى.

    اتوۋاللا سىدىق اكەسىنىڭ تاپسىرماسىن ەكى ەتپەي، ىزدەۋ، ساقتاۋ جۇمىستارىن ۇزبەي جالعاستىردى، الدىڭعى عاسىردىڭ 90 - جىلدارىنا جەتكەندە، ونىڭ جيناپ ساقتاعان ءتوراعا ماۋ زىدۇڭنىڭ سۋرەتتەرى 1000نان استى. وسى ارالىقتا ۇلى ابدۇجەلىل اتوۋاللا دا كورگەنىن ۇيرەنىپ، اكەسىنىڭ ايتقان اڭگىمەلەرىن ۇنەمى ەستىپ، بۇگىنگى باقىتتى تۇرمىسقا وڭاي قول جەتپەگەنىن تەرەڭ سەزىندى.

    «اكەمنىڭ ايتۋىنشا، شەشەم ماعان بوسانعاندا، ءوزى قازعان جەر تولەدە تۇرعان ەكەن، جاعداي وتە اۋىر بولسا كەرەك. ءار كۇنى دەرلىك جۇگەرى ناندى تالشىق ەتەدى ەكەن، ايىنا ءبىر رەت كوجەدەن اۋىز تيسە، تويدان كەم بولمايدى ەكەن. ال قازىرگى تۇرمىسىمىز كۇندە مەرەكە، كۇندە توي، باقىت دەگەن وسى ەمەس پە»، - دەدى ابدۇجەلىل.

    ابدۇجەلىل 1990 - جىلى ۇيلەنەدى، اكەسى جانىنداي كورىپ ساقتاعان ءتوراعا ماۋ زىدۇڭنىڭ سۋرەتى مەن زناگىن جاس وتاۋعا كورىمدىك رەتىندە ونىڭ قولىنا تابىس ەتەدى. ول اسا باعالى تارتۋدى قۋانا قابىلداپ، اتاسى مەن اكەسىنىڭ ءىزىن جالعاۋعا سەرت ەتەدى، سونداي - اق اكەسى ورىنداي الماعان ارماندى ورىنداپ، بەيجيڭدەگى ءتوراعا ماۋ زىدۇڭنىڭ ەسكەرتكىش سارايىنا بارماق بولادى.

جاۋاپتى رەداكتور:سايراش تۇرارجان قىزى